Accessibility links

дүшәмбе, 5 декабрь 2016, Казан вакыты 11:42

Rusiä möftilär şurasınıñ VII konferensiäse tämamlandı


Pänceşämbe könne Qazanda Rusiä islam universitetında Rusiä möftilär şurasınıñ 7 konferensiäse eşen tämamladı. Konferensiäneñ teması-“ Waqıf milke häm anıñ belän idärä itü”, qatnaşuçılar öçen ğibrätle häm kiläçäktä farız ğämäl bulıp çıqtı. Tatarstan möselmannarınıñ waqıf milke bar, ul alarğa qanuni nigezdä qaytarılıp birelgän. Zamanında möselmannarnıñ waqıf milkendä- cir, zavod-fabriqa kebek mal-mölkättä bulğan. Konferensiä barışında şundıy ber qızıqlı fakt iskä alındı. Xäzerge Tatarstan cirlegendä yäşägän möselmannarnıñ Mäkkä-Mädinädä dä mal-mölkätläre bulğan. Xäzerge zamanda, wöcdan irege, süz irege zamanında, waqıf milke belän faydalı itep idärä itärgä, yäğni möselman oyışmalarına, yätim balalarğa, fäqirlärgä yärdäm itärlek itep eşlärgä öyränergä kiräk. Şuña kürä waqıf milke belän idärä itüdä zur täcribäse bulğan Soğud Garäbstanı, Kuveyt kebek däwlät wäkilläreneñ oşbu konferensiädä qatnaşuına Tatarstan Diniä nazäräte zur ömetlär bağladı. Waqıf milke belän idarä itü itärgä öyränü zur ber eş bulsa, äle däwlät qaytarıp birgän waqıf milken ayaqqa bastırırğa kiräk. Möselman däwlätläreneñ mondıy real' yärdäm kürsätüeneñ dä Tatarstanda täcribäse bar. Qazan islam universitetına birelgän binanı tözekländerü, üzgärtep qoruğa İslam üseş bankı matdi yärdäm birgän ide. Konferensiä aldınnan ğına İslam universitetınıñ ğölämälär şurası Qazan islam universitetın- uqu binaları, tulay toraqları, şifaxanäse belän, zur ber kompleks itep tözüne başlaw turında qararğa kilgän ide. Şuña kürä Rusiä möftilär şurasınıñ 7 konferensiäseneñ ğämäldäge İslam universitetında yomğaqlanuınıñ da, axırda konferensiädä qatnaşuçılarnıñ Qazandağı qaytarılıp birelgän waqıf milkeneñ xäle belän tanışıp yörüläreneñ dä kiläçäktä, inşalla faydası tiär äle. Yunıs Ätnäle.

XS
SM
MD
LG