Accessibility links

якшәмбе, 11 декабрь 2016, Казан вакыты 13:00

Hel’sinki tatarları Tatarstannıñ Finländiä belän xezmättäşlegen üsterergä yärdäm itä


16 yündä Qazanğa Finländiäneñ Rusiädäge wäqälätle wäkile Rene Nuberg citäkçelegendäge delegatsiä kilde. Säfärneñ maqsatı – ike yaqlı mönäsäbätlärne üsterü ide. Tatarstannıñ qunaqları arasında Finländiäneñ räsmi keşeläre, eşmäkärläre genä tügel, Hel’sinki tatar cämğiäte citäkçese Okan Daher da buldı. Ul, matbuğat oçraşuında çığış yasağanda, bu yulı anıñ Qazanğa kilüe bötenläy başqa ähämiätkä iä bulğanın bilgeläp ütte. Rusiä häm Finländiä arasındağı xezmättäşlek qorılğanda, tatarlar elek elektän, aradaşçı wazifasın başqarıp kilgän. Finländiä häm Novgorod ölkäse arasında bulğan säwdä yulların iskä aluı da citä. Xäzerge waqıtta da, ike yaq säwdä häm sänäğät ölkäsendä xezmättäşlekne üsterü belän yanıp yöri. Matbuğat oçraşuında, Finländiädäge wäqälätle wäkil Rene Nuberg bu säfärne Tatar cämğiäte räise yärdäme belän oyıştırıluın äytte.

Finländiä häm Tatarstan arasındağı xezmättäşlek 1999 yıldan yañadan başlanıp kitkän. Ul yılnıñ közendä Tatarstan Prezidentı Finländiägä barıp, citdi iqtisatı proyektlar turında söyläşep qaytqan. Bu kilüdä Finländiä wäkilläre üzläre Tatarstan prezident belän oçraşıp, energiäne saqlawçı häm avtomatizatsiäne üsterüçe proyektlar xaqında söyläşü uzdırğan. İke yaqlı mönäsäbätlärne qorırğa yärdäm itkän Finländiä tatar cämğiäte räise Okan Daher da matbuğat oçraşuında çığış yasadı. Ul urısça belmäw säbäple tatarça söyläde. Finländiä ilçese, monda min genä tatarça añlamıym axrısı, digän bulsa da, xäbärçelär arasında añlamawçılar küpçelekne täşkil itkän ide. Şuña, matbuğat oçraşuın oyıştıruçılarğa, Daher çığışın urısçağa tärcemä itärgä turı kilde. «Azatlıq» radiosı xäbärçese Okan äfände Dahirga tatar eşmäkärlärneñ Tatarstanda niçek biznesnı üterüe turında soraw birde. Ul, tözeleştä, yortlarnı torğızuda, mex, kün belän eşläwçe şirkätlärneñ Tatarstanda da eş alıp baru tırışlığı turında söyläde. Qazannıñ 1000 yıllığın bäyräm itüdä dä Finländiädäge tatarlar hiçşiksez qatnaşaçağın äytte Okan Daher.

Bikä Timerova.

XS
SM
MD
LG