Accessibility links

шимбә, 3 декабрь 2016, Казан вакыты 03:30

Udmurtiä başqalası 12 yündä şähär könen bäyräm itte


12 iyündä Rusiä bäysezlek iğlan itkän köndä — Udmurtiä başqalası İjaw şähäre köne dä bilgelänep ütelde. Bıyılğı bäyrämneñ üzençälege — ul inde 11 iyündä ük kiç — şähärneñ üzäk mäydanında xor kollektivları başqaruında konsert belän başlandı. Ul tüläwsez tamaşağa xalıq küp cıyılğan ide. Tamaşaçılarğa caylı bulsın öçen xätta bu uramnan transport yöreleşen dä tuqtattılar. Xor başqarğan cırlarnı yaratuçılar öçen bu ber bäyräm buldı. Balalar häm berniçä xor kollektivı başqaruında yañğırağan cırnıñ ber öleşen sezgä dä citkeräbez, xörmätle tıñlawçılar.

—audio—

Bu konserttan soñ şähärdä berençe tapqır tağın ber qızıqlı tamaşa buldı. İjaw qalasınıñ urtasındağı ike çirkäw häm İjaw maşina zavodı manaralarındağı qıñğırawlar berwaqıtta çıñlap, şähär üzäge açıq hawa astındağı konsert zalına äwerelde. Qıñğırawlarda başqaru öçen maxsus yazılğan Amerika kompozitorı Patrik Xeyzel äsäre yañğıradı.

—audio—

Şimbädä könneñ yañğırlı buluınnan da qurıqmıyça xalıq şähärneñ törle mäydannarında uzdırılğan çaralarda qatnaştı. Anda här millät wäkile üzeneñ küñelenä turı kilgän bäyrämdä qatnaşa aldı. Udmurtlar — qayınlıqta gerber bäyrämendä buldılar, ağaçlıqnıñ ikençe ber çitendä äzerbäycannar, koreyaleler, marilar, çuwaşlar şulay uq üz bäyrämnären oyıştırdılar. Tatarlar İjaw qalasınıñ Lenin rayonında — «Spartak» xalıq icat yortı qarşındağı mäydanda Kiçke sabantuyğa cıyıldı. Yañğır qoyıp yawıp torsa da xalıq taralmadı, üzeşçän artistlar da şämsiä totıp säxnädän çığışların däwam itte.

İjaw şähäre administratsiäse başlığınıñ yärdämçese, elek bu rayon citäkçese Sergey Protazanov ta tatarlar bäyrämendä qatnaştı. Häm här millät wäkile üzeneñ bäyrämnären onıtmasqa tieş, dip basım yasap, şul uq waqıtta bu duslıqnı da arttıra dip quydı.

—audio—

Duslıq mönäsäbätlären isäpkä alıp tözelgän programmada udmurtlar da, ruslar da çığış yasadı. Ä menä kiçke sabantuyğa kilüçelärneñ küñelenä bu bik oşap ta betmäde.

—audio—

Şundıy fiker belderüçelär başqa oçramadı, tik konsert programması belän genä çiklänmiçä, şunda elekkege yıllardağı kebek törle yarışlar, uyınnar da oyıştırılsa, tağın da küñelle bulır ide, şulay uq cırlar, iyüllär arasında süz ostaları da işetelsä, konsert programması da bayıraq bulır ide digän fikerlär işetergä turı kilde. Ä küpçelek xalıq qänäğät, artistlarğa quşılıp biede, cırladı, yañğırdan qurıqmadı.

—audio—

Bäyrämgä näticä yasağanda tatar yäşläreneñ bu mäydanda tügel, ä ikençesendä Mäskäwdän kilgän «Na-na» törkeme konsertın qararğa kitülären isäpkä alıp, mondıy çaralarğa yeget-qızlarnı cälep itär öçen Kiçke sabantuynı başqaçaraq oyıştıru kiräklege dä assızıqlandı. Tatar ictimaği üzäge 90nçı yıllar başında şuşındıy çaralarğa sponsorlar tabıp, törle yarışlar, uyınnar alıp baruçılarnı aldan bilgeläp, büläklären dä xäzerli ide. Ul ğädätne kire qaytarırğa ide dä bit, äle monısı öçen dä aqça birelmäde, artistlarnıñ initsiativasına tayanıp qına eşlädek dip urtaqlaştı «Spartak»nıñ direktorı Rezeda xanım Mirqasıymova. Şähär administratsiäse eşne sorıy, aqça birmi dip zarlanıp ta aldı. 3 iyüngä şähär sabantuyı bilgelängän, anı oyıştıruda millättäşlärebez öleş çığarmasa, ul da oyıştırılmas ide, dip östäp tä quydı Rezeda xanım.

Xämidä Ğäyfullina, «Azatlıq» radiosı, Udmurtiä.

XS
SM
MD
LG