17 iyündä Qazanda, dönya mirası şähärläre oyışmasınıñ 1nçe konferensiäse üz eşen başlap cibärde. Älege oyışma citäkçeseneñ urınbasarı bulıp Qazan şähär başlığı Kamil İsxaqov tora.
Xalıqara konferensiäneñ räsmi açılışı bulğan Piramida binasında, nindi genä il, nindi genä xalıq wäkile oçramadı. Biredä Misır, Gretsiä, Macarstan, Hindstan, İndoneziä, Qıtay, Törkiä, Tailand, Laos häm Bangladeştan kilgän şähär başlıqları, ğalimnär, cämäğät eşlekleläre buldı anda. Dönya mirası şähärläre oyışması barlığı 200 qaladan tora. Anıñ Tönyaq häm Könyaq Yevropa, Latin Amerika häm Afrikada 5 regional bülege eşli. Ä Yevraziä kontinentı şähärläre bülege buldırılğaç, Yevropa häm Aziä şähärläre mirasına bağışlanğan konferensiäne Qazanda ütkärergä qarar qılınğan häm bu çara 17 yündä başlandı. Ul ike kön däwamında baraçaq. Dönya mirası şähärläre xalıqara oyışmasınıñ Yevraziä bülege sekretare Rasix Sağitov söylägänçä, konferensiä Qazan qalasına böten dönyada turistlarnı kiterergä yärdäm itärgä tieş.Turizmnan qala, älege cıyılışında milli mirasnı saqlaw, informatsiä çeltären buldıru, iminlek tä’min itü, bu eşkä yäşlärne cälep itü kebek mäs’älälär qaralaçaq. Konferensiäneñ açılış tantanasında Tatarstan Prezidentı da qatnaştı. Ul, globalizatsiä çorında milli mirasnı saqlaw ähämiätenä basım yasadı, häm Rusiä Prezidentı Vladimir Putinnıñ xalıqara konferensiäne sälämäläw telegrammasın uqıp birde.
Bikä Timerova.
