Accessibility links

Кайнар хәбәр

Qazanda Sabantuyğa äzerlänälär


19 yündä uzaçaq älege bäyrämgä qazanlılar ğına tügel, ä küpsanlı qunaqlar da kiläçäk. Şuña da, aña äzerlek bik qatı bara. Bıyıl da Sabantuy Qazannıñ härber rayonında ayırım ütäçäk. Bäyräm ütä torğan urınnar da şul uq. Barı tik başqalanıñ Waxitov rayonında yäşäwçelär genä Gor’kiy yal parkı yanında yul tözü eşläre baru säbäple bäyrämne Çerek kül isemle yal parkında uzdıraçaq. Sabantuynıñ programması da ğädättägeçä – här mäydanda cırlar, biülär, köräş, sport yarışları, balalar häm olılar öçen törle bäygelär, attraksionnar, küñel açu tamaşaları häm başqalar. Ciñüçelär häm qatnaşuçılar öçen büläklär dä äzer. Mäsälän, köräş batırlarına bıyıl traditsion täkädän başqa qayda suıtqıç, qayda videokamera, ä qayber rayonnarda Oka yäisä 6 modelle VAZ maşinaları büläk iteläçäk. At çabışlarında berençelekne yawlawçılarnı da qimmätle prizlar kötä. Alar ciñüdän soñ üzläreneñ atların timer atqa alıştıraçaq. Tatarstan prezidentı bülägenä çabuçılar arasında berençe urınnı aluçı şaqtıy däräcäle maşina – 10 modelle VAZ avtomobilen alaçaq. Xäyer, Sabantuy maşinalar otmawçılarğa da bik küp qızıqlı, mawıqtırğıç istäleklär büläk itä. Bigräk tä, anda berençe märtäbä qatnaşuçığa. Andıylar da bıyılğı Sabantuyda küp bulaçaq. Mäsälän, Evraziäneñ Bötendönya mirası şähärläre konferensiäsendä qatnaşuçılar. 85 şähärdän kilgän 500läp wäkil Sabantuy belän tanışaçaq.

Xäyer, bäyräm aldı bulsa da, Qazanda bik küp waqiğalar bulıp tora. Şul uq Bötendönya mirası şähärläre konferensiäsendä qatnaşuçılar comğa könne törle seksiälärdä eş alıp bardılar. Alar Evraziä şähärläreneñ matdi häm matdi bulmağan mirasın saqlaw, İslam şähärläreneñ mädäni mirası, globalizatsiä mäs’äläläre xaqında kiñäşläşte. 18 yün könne konferensiäneñ yomğaqlaw cıyılışı uzdı. Şul uq könne Qazannıñ Duslıq yortında Böten dönya şähärläre mirası oyışmasınıñ Evraziä bülegeneñ ştab-kvartirasın açu tantanası uzdı. Başqalada comğa könne Qazan däwlät universitetınıñ 200 yıllığın bäyräm itü turında da söyläştelär. Maxsus şuşı söyläşüdä qatnaşu öçen Rusiäneñ Mäğärif ministrı Andrey Fursenko kilde. Könneñ berençe yartısında ul Qazan kremlendä Tatarstan prezidentı Mintimer Şäymiev belän bergä iñ abruylı yuğarı uqu yortınıñ berse bulğan Qazan universitetınıñ yubileyına äzerlek turında tıñladı. Şulay uq Andrey Fursenko älege universitet belän yaqınnan tanıştı, Tatar gumanitar institutında buldı. Kiçen isä ul Qazannıñ 155 litseyında respublika uqıtuçıları, mäğärif xezmätkärläre belän aralaştı. Rusiäneñ Mäğärif ministrı da 19 yündä uzaçaq Sabantuyda qatnaşırğa tieş. Bäyräm belän tanışu öçen Qazanğa Törkiädän artistka Äydän Şenär dä kilde. Tatarstanlılarğa ul serialı buyınça yaxşı tanış. Citmäsä, Aydan xanım bezneñ yaqtaş ta bulıp çıqtı. Anıñ ätise bezneñ yaqlardan ikän. Aydan Şenär Tatarstanğa ätise belän bergä, anıñ tuğan yaqları belän tanışırğa kilgän.

Ä menä Röstäm Miñnexanov citäkçelegendäge ber törkem tatarstanlılar comğa könne Ufağa kittelär. Alar anda Salawat Yulaevnıñ tuuına 250 yıl tulu uñayınnan ütkärelä torğan çaralarda qatnaştılar. Qazannan Ufağa kitüçelär arasında Robert Miñnullin, İndus Tahirov, Foat Ğalimullin, Nurmöxämmät Xisamov belän bergä Bötendönya Tatar kongressınnan İlsur Hadiullin häm respublikanıñ başqort milli-mädäni moxtariäte citäkçese Firdäwes Bäşirova da bar.

Gölnaz İlgizär

XS
SM
MD
LG