Accessibility links

җомга, 9 декабрь 2016, Казан вакыты 04:57

Ğiraqnıñ waqıtlı premyer-ministrı İyäd Ğälläwi ildäge iminlek köçlärenä yaña eçke qorılış planın täqdim itä


Ğiraqnıñ waqıtlı premyer-ministrı İyäd Ğälläwi bügen, ildäge bar iminlek köçläreneñ dä barı tik aña xisap birep toraçağın iğlan itte. Şuşı çara yardämendä ul yünneñ 30-ında Ğiraqtağı xakimiat cirle idarägä küçerelü aldınnan ildä qupqan totrıqsızlıqnı awızlıqlarğa teli.

Premyer Ğälläwi şulay uq, ğısyançılarğa qarşı köräşü maqsatında Ğiraqta maxsus iminlek köçläre oyıştırılaçağın da belderde.

Audio, İyäd Ğälläwi

"Strategiäbez ğadi, di Ğiraq premyer-ministrı, ilgä solıx, demokratiä häm mullıq kiterü öçen bez bar köçebezne, qüwätebezne häm täwäkällegebezne eşkä cigäçäkbez, igeleklek doşmannarına qarşı Ğiraqnıñ bar iminlek köçläre dä berläşäçäk". Bu waqıtlı premyer-ministr İyäd Ğälläwi süzläre ide. Bügen ul Bagdadta xäbärçelärgä, anıñ citäkçelege astında töp östenlek Ğiraqta, ilneñ bar iminlek köçlären bergä tuplap alar belän näticäle idarä itügä bireläçäk dip belderde. Anıñ süzlärenä qarağanda, Ğiraqnıñ däwläti iminlege öçen bar cawaplılıqnı ul üz östenä ala. Ğälläwi şulay uq yaña xökümätkä, ildäge iminlek köçlären üz wazifaların tieşle däräcädä ütärlek xälgä kiterü öçen xalıqara yardäm kiräk bulaçağın da äytte. Şuña ireşkänçe Ğiraq Quşma Ştatlar citäkçelegendäge Könbatış berektäşlege yaqlawına moxtac bulaçaq dide premyer-ministr İyäd Ğälläwi. Anıñ şuşı planı nigezendä, Ğiraqnıñ qorallı köçläre, baş xärbi idarä citäkçese häm saqlanu ministrı arqılı aña buysınaçaq. Politsiä häm iminlek xezmätläre dä, eşke eşlär wä başqa tieşle ministrlıqlar aşa aña xisap birep toraçaq. Ğälläwi, şuşı plan ildä eçke iminlek mödirlegen qoru öçen nigez buldıra dip äytä. Töp maqsat bulıp, xökümätneñ maxsus iminlek köçlären, terrorçılarğa alar xalıqqa zian kitergänçe ük höcüm yasap yuq itärlek ostalıqqa citkerü häm cihazlandıru tora di Ğiraqnıñ waqıtlı premyerı.

Audio, İyäd Ğälläwi

"Bezneñ qıyu politsiä köçläre köräşneñ aldınğı safında bulaçaq, alarnıñ maxsus bülekçäläre xäzer terrorğa qarşı suğışu, çualışlarnı bastıru öçen äzerlänä häm cihazlandırıla" di Ğälläwi. Ul yaña xökümätneñ Ğiraq çiklären saqlawğa da zur ähämiat biräçägen äytä. İlgä çit il ğısyançıları kerüen tuqtatu maqsatında çik buyı ğäskärläre zamança cihazlar belän tä''min iteläçäk, di xökümät başlağı. Başqa ber yuğarı östenlek birelgän ölkä bulıp Ğiraqnıñ neft industriäseneñ iminlegen saqlaw tora, şul maqsatta ilneñ xärbi hawa köçläre dä qullanılaçaq. Uzğan atnada bulğan küpsanlı höcümnär näticäsendä Ğiraq iqtisadınıñ şuşı möhim tarmağı yänä zur zian kürgän ide. İyäd Ğälläwi bu xaqta bolay di.

Audio, İyäd Ğälläwi

"Ğiraqnıñ doşmannarı neft, elektr, su tä''minatı häm başqa şundıy möhim xezmätlärgä höcüm yasap, yäşäw däräcäsen häm iqtisadi qüwätebezne tübänäytergä tırışa. Bez, şuşı möhim ölkälärne saqlağan köçlärebezne nığıtıp häm alarnıñ cirle politsiä belän eş itüen yaxşırtıp, iminlekne tä''min itäçäkbez" dip ışandıra Ğiraqnıñ waqıtlı premyer-ministrı İyäd Ğälläwi. Anıñ süzlärenä qarağanda, üzeneñ şuşı iminlek planın ul amerikan saqlanu ministrı urınbasarı Paul Wolfowitz häm britan saqlanu ministrlığı wäkile Kevin Tebbit belän kiñäşläşep tözegän.

Kärim Kamal
XS
SM
MD
LG