Accessibility links

якшәмбе, 4 декабрь 2016, Казан вакыты 11:16

Sverdlov ölkäsendä "Sälätle balalar" programması däwam itä


Cäyge kanikullar başlanıp, çığarılış sıynıflarnıñ imtixannarı tämamlanu belän, Yekaterinburg şähärendä eşläp kilüçe “Milli Media-Xolding” citäkçeläre sälätle tatar balaların tağın tügäräk östäl yanına cıydılar. Xäteregezgä töşerep ütik, menä ike yıl rättän Yekaterinburgta “Sälätle balalar” programması eşläp kilä. Üzebezneñ tatar elitasın tärbiäläp üsterü maqsatı belän, tege yäki bu ölkädä zur uñışlarğa ireşkän tatar balaları “Milli Media-Xolding” stipendiatları bulıp sanala. Ay sayın oçraşıp, ber-berse belän aralaşıp yäşäw alar arasında nıqlı duslıq cepläre buldırdı.

Uzğan oçraşu april ayında bulıp, Gabdulla Tuqay icatına bağışlanğan ide. Bu yulı uqu yılı yomğaqlanu uñayı belän iñ berençe çiratta uzğan uqu yılına näticä yasaw buldı. Kem nindi uñışlarğa ireşkän, nindi qızıqlı waqiğalar bulıp uzğan, şul turıda fiker alışular bulıp uzdı.

Uqu yılın bar da bik yaxşı bilgelärenä genä tämamlağannar. Küp kenä balalar ölkä külämendä uzdırılğan cır häm bayu konkurslarında lawreat isemen ayulap alğannar, “Kügärçen” balalar ansamblenä yörüçelärne bu yıl xätta Slovakiädä bulıp uzaçaq xalıqara festival'gä dä çaqırğannar.

Kiçä barışında tatar xalqınıñ milli bäyräme sabantuy temasına bağışlanğan viktorina bulıp uzdı. Balalar bu bäyrämneñ asılın, tarixın, yolaların belülären kürsättelär. Annan soñ tatar xalıq cırların başqaru buyınça köç sınaştılar. Sigez yäşlek Eliza Maxiänovanıñ cırlawın xalıq ise kitep tıñladı. Elizanıñ däw änise – Räysä Maxiänova Sverdlov ölkäsendä yäşäwçe tatarlar arasında näfis süz ostası bularaq tanılğan keşe. Qatnaş nikaxtan tuğan onığın tatar ruxında tärbiäläp üsterü öçen küp köç quyğan ul. Eliza Maxiänowa inde öç yäşennän birle säxnädä. Anıñ tawışındağı çın tatar moñına is kitärlek.

Tatar xalıq cırların osta itep başqaruçılar arasınnan Albina Waxitova ayırılıp tordı. Albina inde küptän Sverdlov ölkäse tatarlarınıñ iñ yaratqan cırçısına äwerelde. Bu yıl un klassnı bik yaxşı bilgelärenä genä tämamladı ul. Tağın ber yıldan anı olı tormış yulı kötä.

Milli Media Xolding stipendiatları arasında inde mäktäpne tämamlağannar da bar. Bu oçraşu waqıtında alarğa istälekle büläklär tapşırıldı, izge teläklär telände. Üz çiratında balalar Milli Media-Xoldingnı ğämälgä quyuçı tatar eşmäkärläre Rinat Sadriev, Rinat Askarov, Albert Afzalovqa, şuşındıy eçmälekle kiçälär oyıştıruğa zur köç quyğan Miñsılu häm Nazlığöl İjguzinalarğa olı räxmätlär belderdelär.

“Sälätle tatar balaları” programması, tağın da kiñäytelgän sostav belän, sentäber ayınnan yañadan eşli başlayaçaq. Ä xäzergä alarnı yämle cäy, küñelle yal kötä.

Fäwiä Safiullina, Yekaterinburg

XS
SM
MD
LG