Accessibility links

чәршәмбе, 7 декабрь 2016, Казан вакыты 13:39

Könyaq Koreä xökümäte basımğa birelmi, Ğiraqqa östämä ğäskärilär cibärüdän waz kiçmiäçägen belderä


Üz watandaşınıñ Ğiraqta totıq itep alınuına häm monı eşlägän ğısyançılarnıñ anı cäzalap üterü belän yanawına qaramastan Könyaq Koreä xökümäte Ğiraqqa östämä 3 meñ ğäskärien cibärü planınnan waz kiçmiäçägen belderde. Totıq aluıçlar isä Könya Koreä xärbiläreneñ Ğiraqtan tämam kitüen taläp itkän ide. Monıñ öçen birelgän waqıt düşämbe kiçen çığa.

Könyaq Koreä xökümäteneñ Ğiraqqa östämä ğäskär cibärü niätennän waz kiçmiäçägen düşämbe irtän Seulda ilneñ tışqı eşlär ministrı urınbasarı Çoy Yoñ Cin iğlan itte. Ul xäbärçelärgä, Könyaq Koreä andıy basımğa birelmiäçäk dip belderde.

Audio, Çoy Joñ Cin

"Min sezgä şunı äytäm, xökümätneñ töp niätendä häm qaraşında - Ğiraqnı tözekländerü öçen anda ğäskärilär cibärü planında üzgäreşlär bulmayaçaq" di Könyaq Koreäneñ tışqı eşlär ministrı urınbasarı. Berük waqıtta ul üz xökümäteneñ Ğiraqta totıq itep alınğan 33 yäşlek Kim Sunilne azat itü öçen barın da eşliäçägen wäğdä itte. Könyaq Koreäneñ xäbärlär agentlığı Seulnıñ düşämbe töştän soñ İordaniägä 6 keşedän torğan maxsus wäkillek cibärüen belderde, alar Kimne azat itügä bulışırğa tieş bulaçaq. Läkin düşämbe kiçen inde, ğısyançılar quyğan taläpne ütäw öçen waqıt çığa, Könyaq Koreäneñ Ğiraqta urnaşqan 600 ğäskärien ildän çığaru häm yañaların cibärü planınnan waz kiçü öçen alar Seulğa 24 säğät waqıt birgän ide. Şuşı taläp ütälmäsä Kimne totıq itep alğan törkem anıñ başın kisäçägen belderde, taläp yazılğan videosürät kiçä "äl-Cäziyrä" telekanalı aşa kürsätelde. Könyaq Koreä watandaşın urlawçı qorallı keşelärneñ berse bolay dide.

Audio, äl-Cäziyrä

"Bu Könyaq Koreä xökümäte häm bar Koreä xalqı öçen xäbär - bez sezdän ğäskärläregezne bezneñ cirebezdän çığarunı häm yañaların cibärmäwne sorıybız, ägär dä bu ütälmäsä bez sezgä menä şuşı Koreä başın häm anıñ belän bergä Koreäneñ biredäge bar ğäskäriläre başın da cibäräçäkbez, sezgä yäkşämbedän alıp 24 säğät birelä" di "äl-Cäziyrä" telekanalı kürsätkän videoda Ğiraqtağı qorallı ğısyançılarnıñ berse. Könyaq Koreä watandaşın totuçılar üzlären, "äl-Qaidä"gä bäyle dip farazlanğan mäğlüm Äbu Musa äl-Zärqäwi oyışması keşeläre dip tanıta, Kimnän tış alar qulında tağın 10-lap çit il keşese bula ala digän xäbärlär bar. Bu xaqta Kim eşlägän şirkätneñ mödire Kim Çunho belderä, ul Fälluca şähärenä şul ğısyançılar belän Kimne azat itü xaqında söyläşer öçen ber qiraqlını cibärgän bulğan, ul anda tağın 10-lap totıq buluın kürgän, şularnıñ kimendä berse Yevropadan kilgän xäbärçe dip äytkän. Kim 17-nçe yündä, eşe belän Fällucağa kilgäç urlanğan ide, ul eşlägän şirkät Ğiraqtağı amerikan ğäskärlären tä''min itü belän şöğellänä. Könyaq Koreä totığı Ğiraqta inde 8 ay eşlägän bulğan. Anıñ señlese süzlärenä qarağanda, äle mäktäptä ük ğäräpçä häm inglizçä öyrängän Kim yül ayında, ätiseneñ 70 yäşen bilgeläw öçen Könyaq Koreägä qaytırğa cıyınğan bulğan. Ägär dä Könyaq Koreä xökümäte, ğısyançılar quyğan taläpkä qaramıy, Ğiraqqa östämä ğäskärilär cibärsä, ul andağı xärbiläreneñ sanı yağınnan Quşma Ştatlar häm Britaniädän soñ öçençe il bulaçaq. İlneñ prezidentı Ru bäyän itkän belderüdä, Ğiraq xalqına şunı añlatu kiräk - Könyaq Koreä anda ğäskärlären Ğiraqqa qarşı eş itü öçen tügel, ä ilne tözekländerügä bulışu maqsatında cibärä, dielä. April ayında Ğiraqta Könyaq Koreäneñ 7 watandaşı ber qorallı törkem tarafınnan inde totqarlanğan ide, läkin soñraq alar azat itelde.

Kärim Kamal
XS
SM
MD
LG