Accessibility links

якшәмбе, 4 декабрь 2016, Казан вакыты 00:59

İnguşetiädä kötelmägändä kilep çıqqan qorallı bäreleşlärdä 50 tiräsendä keşe hälak bulğan


Uzğan töndä İnguşetiädä qorallı bäreleşlär qabınıp kitte, qorallı törkemnär berniçä şähär häm auılğa höcüm ittelär. 50 tiräsendä keşe hälak bulğan. Yaralanuçılar küberäk. İnguşetiä Eçke eşlär ministerlegenä dä, Russiä çik saqçılarına höcüm itelgän. Bu, respublikada 2002-nçe yılnıñ sintäberennän soñğı iñ qatı qorallı bäreleşlär dip xisaplana. Ul çaqta yözärlägän çeçen köräşçese Russiä xärbiläre belän bäreleşkän ide.

Russiä prezidentı Putin bügen İminlek köçläreneñ räsmilären Kremlgä çaqırtıp , höcüm öçen cavaplı bulğannarnı tabıp, alarnı yä üterergä yäisä totarğa quştı.Yıraq Könçığışta xärbi maneverlarnı küzätep barğan saqlau ministere Sergey İvanov İnguşetiäneñ eleke başqalası Nazranda urnaşqan xärbi büleklärne qullanu kiräk bulmas digän fikerdä.

Audio

Qorallı bäreleşlär qorallı köräşçelärneñ Nazrandağı İnguşetiä Eçke Eşlär ministelege başkvartirına häm yanındağı qazarmalarğa höcüme belän başlandı. Şunda ğına da 30 militsiä xezmätkäre , şul sanda Eçke Eşlär Ministere vazıyfasın ütävçe Abukar Kostoyev häm anıñ urınbasarı Zyautdin Kotiyev tä üterelgän. Russiä baş prokurorı Ustinov İnguşetiä prokuraturasınan biş keşe üterelde dip belderde. Qayber xäbärlärgä qarağanda, Nazran baş prokurorı Muxazbek Buzurtanev häm rayon prokurorı Belan Oziev üterelgännär. Höcüm itüçelär qoral häm ammunitsiä urlap çigengännär. Bu xaqta täfsille häm döres mäğlümät alu qıyın. Cirle xakimiätlär 200 çaması qorallı köräşçelär Çeçnä häm Tönyaq Osetiädän İnguşetiägä kerdelär dip belderdelär. Nazrannan tış Qarabulak şähärenä häm berniçä auıldağı militsiä büleklärenä höcümnär bulğan. İnguşetiä Eçke eşlär ministerlege , köräşçelär Çeçenägä çigenälär dip belders dä, İtar-Tass Tönyaq Osetiä çige yanında qorallı bäreleşlär bara dip belderde. Höcümnärne Şamil basayev oyıştırdı digän ğäyeplävlär yañğırasa da, älegä ber kem dä cavaplılıqnı üz östenä almadı. Höcümnärneñ ber ük vaqıtta törle urınnarda alıp barıluına qarap, bu eş centekläp planlanğan dip äytergä bula. Çeçen köräşçeläreneñ citäkçese Aslan Masxadov uzğan atnada Radiobıanıñ Tönyaq Kafkaz redaksiäsenä birgän intervyusında bolay digän ide.

Audio

Ruslar yäşerergä tırışsalar da bez här kön sayın alarnıñ köçlärenä qarşı operatsiälär alıp arabız. Ber tävlektä 8-10 urında sabotaj aktları oyıştırıla. Här kön sayın alarnıñ 10-20 xezmätkäre üterelä. Alarnıñ Nojay-yurt häm Vedeno rayonnarındağı quştannarı qorban bula. Läkin bez taktikanı üzgärtüne planlaştırabız. Bez älegäçä sabotaj belän şäğellängän bulsaq, monnan soñ kiñkülmle höcümnär oyıştıraçaqbız.

Masxadovnıñ bu belderüe belän İnguşetiägä höcüm arasında bäyläneşneñ buluı-bulmauı xaında älegä ber närsä dä äytep bulmıy. Yevropa Şurasınıñ general sekretarı Walter Şwimmer höcümnärne xökem itte.

Audio

Uzğan töndä räsmi binalarğa häm militsiä stansiälärenä bulğan 40-tan artıq keşeneñ ülenä säbäp bulğan höcmnäre tik xökem genä itep bula. Terror häm köç qullanu politik xäl çarasına alıp barmıy. Politik xäl çarası berdän ber yul.

Läkin, Şwimmer ber ük vaqtta Russiäne regionda solıx urnaştıruğa öleş kertergä dä çaqırdı.

Audio

Çeçnädä demokartiä, qanunçılıq häm keşe xoquqların tulıınça urnaştırğan xäldä genä Russiä federatsiäseneñ bu öleşendä cäfalanunı tutqatıp bulaçaq.

İnguşetiä prezidentı Murat Zyäzikov öç könnek matäm iğlan itte.

Färit İdelle, Praga

.
XS
SM
MD
LG