Accessibility links

шимбә, 10 декабрь 2016, Казан вакыты 13:58

Tatar yäşlär forumına soñğı äzerlek çaraları kürelä


Qunaqlar kilä başladı inde, cıyılışta notıq belän çığış yasayaçaq keşelär, dulqınlanıp, üz waqıtın kötep tora. «Tatarstan yäşläre» gäzite, Tatar kongressı belän bergälektä, forumğa maxsus turı kiterep, büläkkä cır äzerli. Anıñ tekstın jurnalist Flera Nizamova yazğan, üzeşçän kompozitor Röstäm Zaripov köyen icat ikän. Cırnı başqaru eşenä «Qazan yegetläre» häm «Zö-läy-lä» kebek iñ populär törkemnär alınğan. Cırda şundıy süzlär bar :

Onıtma teleñne,

Yuğaltma yözeñne,

Moñ tulı küñelebez yäş äle,

Qäderlä illeñne, Tatarstan yäşläre.

Älege cır kergän maxsus kompakt disk, tatar yäşlär forumına bağışlap çığarıla. Anda tağın Xaniä Färxineñ «Bötendönya tatarları cırı», Rufina Ğiläcevanıñ «Tatar köräşe», Zölfät Xäkimneñ «Qazan qala» kebek cırları belän bergä tuplanıp bireläçäk. Älege CDnı çığarğa alınğan «Bars-Media» şirkäte: «proyekt kommersiä yağınnan fayda kitermi, imidj, yäşlärne milli ruxta tärbiäläw öçen genä eşlänä», dip belderde. Millät, yäşlek, Qazan turındağı cırlar cıyıntığı Forumğa kilgän 500 delegatqa da bireläçäk ikän. Ä tatar yäşlär forumı belän qızıqsınu artqannan arta bara. Forumğa çaqırılğan barlıq delegatlar da, kilülären beldergän. Belgänegezçä, Ukraina, Belorussiä, Aziä däwlätläre häm Baltiq illärendä yäşäwçe tatar yäşläreneñ yul xaqların Rusiäneñ İlçelekläre tüli. Çönki, Tatar Kongressı bıyıl berençe tapqır, Çit ildäge Rusiä watandaşlarına yärdäm itü federal programmasında qatnaşuğa ireşkän. Belgänegezçä, forumdağı citdi söyläşülär 25 iyündä, 4 törle seksiädä häm plenar utırışta bulır qaralğan. Alar arasında milli mäğärif häm fän turında söyläşü, mädäniät häm ruxi miras, eşmäkärlek, din, mäğlümat çaraları kebek temalar da bar. Plenar utırışta Kongress räise töp doklad belän çığış yasar dip kötelä, Parlament räise Färit Möxämmätşin da, Tatarstan isemennän notıq totar, dip planlaştırılğan.

Forumnı oyıştıruçılar, tatar problemasına da yañaça qararğa täqdim itälär. Mäsälän, forumnıñ axırğı qararlarında, tatarlar yäşägän şähärlärdä milli möhit buldıru problemalarına iğtibar yünälteler, dip uylanıla. Şulay uq, tatarça belmägän millättäşlärebezgä kimsetep qaramıyça, aları ictimaği eşlärgä nıqlaplar cälep itü, kebek mäs’älälär dä eş käğäzlärendä urın tabırğa tieş.

Bikä Timerova.

XS
SM
MD
LG