Accessibility links

чәршәмбе, 7 декабрь 2016, Казан вакыты 23:26

Powell uzğan yıldağı terror aktları turındağı xisapqa tözätmälär kertte


AQŞ Dävlät Departamentı global terror turındağı xisabın üzgärtte. Bu yılnıñ April ayında iğlan itelgän ul xisapta uzğan yıldı dönyaküläm terror höcümnäreneñ sanı kimede dielgän ide. Sişämbe könne isö, 2003-nçe yılda terrorizm arttı häm monıñ näticäsendä hälak bulğannarnıñ sanı başta äytelgängä qarağanda ike märtäbä küberäk buldı digän tözätmä kertelde.

Baştağı raportqa qarağanda, uzğan yılda dönyada 190 terror aktı bulğan. Xäzer bu san 208 dip üzgärtelde. Şulay uq terror höcümnäre näticäsendä 307 keşe hälak buldı dip belderelgän bulsa, bu san 625-kä kütärelde. AQŞ dävlät sekretarı Colin Powel raport administratsiäne yaxşıraq kürsätä öçen üzgärtelmäde, baştağı sannar xatalı ğına buldı dip belderde.

Audio

"Raport bezneñ tırışlığıbıznı yaxşıraq yäisä naçarıraq, terrorne yaxşıraq yäisä naçarıraq kürsätü öçen tügel, ä amerikan xalqına faktlar birü öçen äzerlände."

Dävlät sekretarınıñ urınbasarı Riçard Armitaj baştağı xisapqa tayanıp, bu prezident Buşnıñ terrorğa qarşı säyäsäteneñ uñışın kürsätä dip beldergän ide. Anıñ süzlärençä, AQŞ häm başqa dävlätlär terrorğa qarşı uñışlı kampaniä alıp baralar. Tänqitçelär isä, Noyäber ayındağı prezident häm kongress saylaularında politik östenlek alır öçen administratsiä döres bulmağan statistik mäğlümätlärdän faydalana dip belderdelär. Powel bu ğäyeplävlärne kire qaqtı Anıñ süzlärençä, administratsiädä ber kem dä elekke statistik sannar terrorğa qarşı suğıştan ciñep çığılğan buluın kürsätä dip däğvä itmägän.

Audio

"Xäzer dä terrorğa qarşı suğış bara. Armitaj da ciñügä ireşelde dip äytmäde dip uylıym. Ciñügä ireşmädek. Suğış dävam itä."

Bu turıda yıllıq raport Kongress kürsätmäsenä esasän äzerlänä. Powell bu xaqta bolay dide.

Audio

"Dävlät Departamentı häm Teror Xäfeve İntegratsiä Üzäge häm älbättä, bez administartsiädäge keşelär häm prezident Köngress häm amerikan xalqına mömkin bulğan xäldä iñ yaxşı informatsiä häm analiz birü mäsäläsendä cavaplılığıbızğa citdi qarıybız. Xisapnı tüzätü öçen bu mömkinlekneñ buluın xuplıym."

Amerikan Enterprise İnstitutı xezmätkäre Thomas Donnelyneñ fikerençä, baştağı raportta axmaqça xatalar bulğan häm ul Powellneñ bu xatalarnı tözätüenä yuğarı bäyä birgän. Bu institut xökümätneñ rolen çiklävne , köçle tışqı säyäsät häm milli saqlanunı yaqlıy. Prezidentlıqqa kandidat senator John Kerryneñ süzçese Phil Singer bu insident administratsiäneñ terrorğa qarşı suğış mäsäläsendä xäqiqät belän uynauın kürsätkän soñğı misal bulıp tora dip belderde. AQŞ Kongressı Tikşerü Xezmäteneñ terror buyınça belgeçe Raphael Perl bu insident Buş administratsiäseneñ ışanıçlılığına zian kiterde digän fiker häm anıñ xatalarnı tözätüe raportnı aqlağandır digän ömet belderde.

Färit İdelle, Praga.
XS
SM
MD
LG