Accessibility links

пәнҗешәмбе, 8 декабрь 2016, Казан вакыты 03:11

Altın qäläm festivale däwam itä


Respublika mäktäplärendä bu könnärdä çığarılış kiçäläre bara. Alarda bıyıl 50 meñnän artıq uquçı qatnaşa. Bu uquçılar xäzer üzläreneñ berençe zur kiçälärenä äzerlänä. Yuğarı uqu yortların tämamlawçılar da 5 yıl buyı belem alğan institut, universitetları belän sawbullaşa. Üzeneñ 200 yıllıq yubileyın bilgeläp ütärgä cıyınuçı Qazan däwlät universitetında 23 yün könne çığarılış kurs studentları cıyıldı. Läkin alar ğadi uquçılar ğına tügel. Çärşämbe könne monda uzğan tantanada universitetnıñ iñ yaxşı studentları cıyıldı. 2004 yılda Qazan däwlät universitetın tämamlawçı meñ yarımnan artıq studentlar arasında saylanıp alğan 200 keşegä maqtaw gramotaları tapşırıldı. Alar üzläreneñ yaxşı uquı, uñışlı fänni häm ictimaği eşçänlekläre öçen büläklände. Älege maxsus gramotanı büläklänüçelär universitetnıñ rektorı Mäğsüm Salaxov qulınnan aldılar. Älege çara Qazan universitetınıñ 200 yıllığına bağışlanıp ütkärelde.

İmtixannar, çığarılış eşläre belän mäşğül bulmağan yäşlär isä yal itä, törle festival, bäygelärdä qatnaşa. Çärşämbe könne respublikanıñ Säwdä-iktisadi palatasında balalar tarafınnan äzerlängän biznes-plannar bäygesen yomğaqlaw çarası uzdı. Bu könnärdä Balalar häm yäşlär matbuğatınıñ Altın qäläm dip isemlängän IX respublika festivale dä däwam itä. Altın qäläm ölkänräk jurnalistlarnıqı kebek ük teploxodta uza. Festival’dä qatnaşuçı 100dän artıq keşe Boris Polevoy köymäsendä sişämbe kiçen Tübän Novgorodqa kilep citte. Çärşämbe könne alar şähär belän tanıştı. Xäyer, yäş jurnalistlarnıñ ekskursiälärdän tış ta eşläre şaqtıy. Alar rus häm tatar tellärendä gäcitlär, radioprogrammalar çığara, täcribäle jurnalistlar ütkärä torğan master-klasslarda qatnaşa, törle temalarğa tügäräk östäl söyläşülärendä fiker alışa. Bäygeneñ näticäläre 24 yündä iğlan iteläçäk. Älege festival’dä Gran-priğa layıq dip tabılğan yäş jurnalist Qazan däwlät universitetınıñ jurnalistika fakul’tetına imtixansız qabul itelä. Şuña da, här qatnaşuçı bäygedä ciñügä ireşergä tırışa. Qazanğa Altın qälämçelär pänceşämbe könne qaytaçaq. Ä bügen inde başqalağa 24 yün könne üz eşen başlayaçaq Yäşlär forumında qatnaşuçılar kilä başladı.

Gölnaz İlgizär

XS
SM
MD
LG