Accessibility links

пәнҗешәмбе, 8 декабрь 2016, Казан вакыты 21:15

Başqortstanda atom elektr stansiäse tözeleşe öçen aqça tabılırmı?


Elegräk tä xäbär itelüençä, 4-5 iyün könnärendä Qazanda Tatarstan häm Başqortstan atom elektr stansiälären tözügä qarşı konferensiä bulıp ütkän ide. Anda qatnaşuçılar ike respublikta da atom elektr stansiälären tözüneñ xäwefle ğämäl buluı xaqında süz alıp bardı. Şulay uq ike respublika prezidentları Şäymiev belän Räximov äfändelärgä bu tözeleşne başlamaw öçen töple dälillär belän möräcägätlär qabul itelde. Qazandağı konferensiädä Başqortstannan kürenekle ekolog – ğälim Boris Pawlov ta qatnaştı häm çığış yasadı. Bu atnada Boris Pawlov Mortaza Räximov isemenä qabul itelgän möräcägätne anıñ üzenä tapşıru öçen qanselyäriägä qaldırğan. Şul möräcägätneñ küçermälären ul xäzer bäysez mäğlümat çaralarına da tarata. «Azatlıq» radiosı xäbärçesenä dä bu möräcägätne tapşırdı ul. Şulay uq Başqortstan atom elektr stansiäsen tözüneñ niqädär xäwefle eş buluı xaqında qayber fikerläre belän dä urtaqlaştı Boris Pawlov. Boris Pawlov äytüençä, «Rosenergoatom» şirkäteneñ – Başqortstanda atom elektr stansiäsen tözü öçen finans mömkinlekläre yuq ta. Anıñ citäkçeläre Ağidel şähärendäge stansiäneñ täwge bloğın tözü öçen nibarı 1 milliard sum ğına aqça ışandıra. Ä bit bu öleşne genä tözü öçen dä cämğıse 7 milliard sum aqça kiräk. Şulay bulğaç qalğan 6 milliard sum aqçanı Başqortstan üz qaznasınnan çığarıp salırğa tieşme? «Läkin respublika iqtisadı üze dä yünläp ayaqqa basa almağanda, küp urınnarda xezmät xaqları burıçları haman sayın artıp barğan ber waqıtta bu aqıllı ğämäl bulmas ide, – di Boris Pawlov. – Haman şul az ğına aqçağa eşläp yörgän uqıtuçılar, tabiblar häm byüdjettağı başqa hönär iäläre cilkäsenä töşäçäk bit bu tözeleşneñ awırlığı».

Ämma Başqortstan xakimiätläre Ağidel şähärendäge atom elektr stansiäse tözeleşen yañartunı üzläre öçen xäl itelgän mäsälä dip qabul itä. Aña cämägätçelek fikeren äzerli toru öçen respubliknıñ räsmi matbuğatında äledän – äle uñay mäqälälär dä basılıp tora. Şundıy ber yazma 25 iyün könne «Veçernyaya Ufa» gäzitendä dä basılıp çıqtı. «Başqortstan AESınıñ ör – yaña tarixı» dip atalğan bu yazmada atom elektr stansiäsen tözüneñ Başqortstan öçen bik faydalı häm otışlı bulaçağı xaqında bäyän itelä. Şulay itep atom stansiäseneñ ör – yaña tarixı başlana. Anıñ ni räweşle baraçağın häm tämamlanaçağın älegä berkem dä äytä almastır.

XS
SM
MD
LG