Accessibility links

дүшәмбе, 5 декабрь 2016, Казан вакыты 17:34

Äfyünçelärgä qarşı köräş näticäle bulırmı?


Mäğlüm buluınça, 26 iyün köne – narkomaniägä qarşı Xalıqara köräş köne bularaq bilgelänä. Şuşı uñaydan Rusiä Federätsiäseneñ narkotik häm psixotrop matdälär äyläneşenä qontrol'lek itü buyınça Başqortstan idaräse başlığı Ämir Niğmätcanov «Başinform» mäğlümat ağentlığında jurnalistlar öçen matbuğat oçraşuı ütkärde. Anda ul üze citäklägän idaräneñ bıyılğı yartı yıllıq eşçänlege yomğaqları belän tanıştırdı. Matbuğat oçraşuında kiterelgän qayber sannar Başqortstanda narkomaniäneñ kiñ taraluı häm narkotik matdälär belän alış – bireş itüneñ bik nıq artuı xaqında söyli. Ämir Niğmätcanov äytüençä, bügenge köndä Başqortstanda räsmi terkälgän narkomannar sanı altı- cide meñ tiräse. Läkin bu san çınlıqta 80 – 90 meñgä citä, dide ul. Alar arasında betep betkän narkomannar da, äle yaña ğına şuşı tayğaq yulğa kerä başlawçılar da bar. Ayıruça narqomannarnıñ yäşärä baruı borçuğa sala. 14 – 15 yäştäge äfyünçelär dä bar ikän xäzer. Ämir Nigmätcanov süzlärençä, Başqortstan narkotiklarnı qullanuçı töbäk kenä tügel, ä alarnı başqa töbäklärgä ütkärüçe tranzit respublikağa da äylände. Äfğanstannan uq kiteleüçe äfyünnär Taciqstan, Qazaxstan, Irımbur häm başqa töbäklär aşa Başqortstan cirenä kilep kerä häm inde Başqortstan aşa ütä alsa, il eçenä dä könbatışqa taba yulın däwam itä. Narkotik matdälär Başqortstanğa nigezdä automobil yulı belän kerä ikän. Bıyılğı 5 ayda ğına da Başqortstanda narkotiklar belän bäyle 412 cinayät terkälgän, 366 cinayät eşe quzğatılğan. Şularnıñ 70 protsentı awır cinayätlär sanala. Bıyıl ğına da Başqortstanda 18 kilogramğa yaqın geroin, 21 kiloğramm mäk sabaqları, 16 kiloğa yaqın marixuana, ike kilo yarım opiy tartıp alınğan. Matbuğat oçraşuında äytelüençä, bügenge köndä Başqortstanda narkotiklarnıñ qanunsız äyläneşe belän bäyle yegermegä yaqın zur oyışqan cinayätçelek törkeme bar dip isäplänä. Kiläçäktä bu sannıñ da artuı bik ixtimal, dide narkotiklarğa qarşı köräş idaräse başlığı. Kiläçäktä bu oyışma täcribä tuplıy başlağaç, andıy törkemnärne tabu häm cinayätçelärne mäxkämä aldına bastıru ciñelräk bulaçaq. Äle ber yıl ğına eşläwçe narkopolıytsiäneñ älbättä bu ölkädä eşçänlege tieşle däräcädä bulıp betä almıy. 70 protsent xezmätkärlären elekke salım politsiäse wäkilläre täşkil itkän bu oyışmağa äle täcribä tuplıysı da tuplıysı. Kem äytmeşli, bu oçraqta eş barışında öyränäçäklär inde.

XS
SM
MD
LG