Uzğan proğrammalarıbızda äytelgänçä, Başqortstan tatar cämägätçelek oyışmaları 19 iyündä ütkärelgän üz cıyınında respublikta tatar telenä dä däwlät tele statusı taläp itü mäs'äläsendä referendum ütkärügä äzerlek başlarğa qarar itkän ide. Kiläse atnanıñ sişämbe könendä, referendumğa äzerlek alıp baruçı initsiativ törkemne oyıştıru maqsatında, Ufada cıyılış bulıp ütäçäk. Başqortstan Tatar ictimağıy üzäge räise Ayrat Ğiniätullin äytüençä, bu törkemgä utızdan artıq keşe kerergä mömkin. Älege törkem tözelgäç, anı Başqortstan Üzäk saylaw komissiäsendä terkäw öçen xästärleklär başlana. «Ämma Üzäk saylaw komissiäse räise itep yänä dä Barıy Kincäğulovnıñ saylanuı bu eştä küp kirtälär tudıruı ixtimal, – di Ayrat äfände. – Çönki anı teläsä nindi yullar belän initsiativ törkemne terkätmäskä tırışaçağın bügennän ük çamalap bula. Niçek kenä bulsa da bez bu eşne başlıybız. Anda urıs äytmeşli «война план покажет».
Mäğlümat öçen şunısın da äytik, referendum ütkärügä fatıyxa alu öçen Başqortstanda barlıq saylawçılarnıñ 2 protsentınıñ imzası taläp itelä. Bu 60 meñ keşe digän süz. Tatar cämägätçelege bu qädär genä imza cıyu çiten eş tügel dip isäpli. Ägär dä inde respublika xaqimiätläre häm urınnardağı xakimiät başlıqları bik nıq qarşılıq kürsätmäsä. Ä inde alar yağınnan qarşılıq bulaçağı ayırım açıq bilgele. Çönki xakimiät başlıqları üz urınnarı öçen qurqıp, üz rayonnarında imza cıyunı buldırmasqa tırışaçaqtır.
Fänis Fätxi, Ufa
Fänis Fätxi, Ufa
