Accessibility links

пәнҗешәмбе, 8 декабрь 2016, Казан вакыты 07:07

Tatnet : iğtibar üzägendä yäşlär forumı


Dönya tatar yäşläreneñ bergä cıyılıp, törle aktual temalarğa fiker alışuı – internet dönyasında berençe çiratta zur qızıqsınu uyattı. Cäy başlanu säbäple häm forumnarnıñ kübäyüe säbäple , global çeltärdä fiker alışa torğan säxifälärdä beraz torğınlıq sizelä ide. Xäzer isä, xällär bötenläy başqaça. Mäsälän, tatarlar.ru häm tatforum.tk saytlarınıñ urtaq forumı, tatforum.at.tt adresında açıla torğan internet säxifädä Qazanda ütä torğan yäşlär cıyını turındağı söyläşüen ayırım tema itep bülep çığarılğan.

Närsä yazalar disezme? Berençe itep, yäşlär forumınıñ programması tiräsendä gäp qorıldı. Konsert häm oçraşular, biülär, küñel açular, citdi söyläşülärgä qarağanda kübräk urın alıp tora, digän tänqit belderelde. Şunnan soñ, närsä xaqında söyläşergä, niçek itep forumnı näticäle itärgä digän mäs’älä kütärelde, borçığan mäs’älälär turında şuşında yazıp qaldırırğa täqdim itelde. Nindi täqdimnär kilde di? Mäsälän, Raxmetov isemle forumçı xalıqara tatar yäşläre oyışmasın tözergä täqdim ittä. Yäşlärgä, tübätäy genä tügel, aldağı ictimaği eştä qullana alırlıq materiallar taratırğa kiräk, dielde, tatar aşların äzerlärgä, internet säxifäsen yasarğa da öyrätsennär, dielgän täqdimnär yañğıradı. Pafoslı söyläşülärdän mäğnä yuq, millät üseşe, yäşlärneñ milli añın kütärü mäs’äläsendä citdi söyläşülär alıp baru bulsın ide. Çirattağı yäşlär oyışmasın tözep, eş kürsätügä, äylänep qalmasın ide, digän tänqitlär dä äytelde. Axır çiktä, qaysıber virtual forumçılarnıñ real tormıştağı cıyında qatnaşa almawı belende. Alar seksiä barğan cirlärdä web-kameralar quyıp, dokladlarnı internetta tapşırırğa ütenep soradılar. Läkin, bezgä bilgele bulğança, başta bu qaralsa da, soñınnan oyıştıruçılar, bu eştän baş tartqan. Söyläşä torğaç, internet aşa aralaşa torğan tatar yäşläre, Qazandağı çaralardan başqa da, virtual tatar yäşlär forumın oyıştırırğa buldı. Mäsälän, şuşı tatforum.at.tt internet säxifäsenä kerep, fiker alışırğa bula ikän. Läkin ber Başqortstan qızı, ul Altınçäç iseme belän yazışa, söyläşülärdän genä mäğnä barmı, bezgä mäsälän tatar tele däreslekläre kiräk, dip bäxäslärgä noqta quya.

«Tatmedia» agentlığı da tatar yäşlär forumı turında söyläşer öçen, üzeñneñ säxifäsendä dä urın birä. Här seksiäneñ teması ayırılıp kürsätelgän, forumda tatar yäşlär cıyına ber bülek birelgän. Älegä forum buş. Anda ez qaldırıp kitärgä häm başqalar yazğannı kürergä teläsägez tatmedia.ru saytında forum bülegen ezlägez. Real tormıştağı tatar yäşlär forumı turında operativ xäbärlärne sez «Azatlıq» radiosınıñ internet säxifäsendä, Anıñ adresı www.azatlıq.org, şulay uq, intertat.ru, tatar.ru kebek xäbärlär saytlarında da taba alırsız. Bu yäşlär forumı belän Saban tuylar turında xäbärlär çitkäräk qaldı. Ä menä Kanada tatarlarınıñ bäyrämne ütkärergä cıyınuı turında xäbär dä şuşı könnärdä çıqtı. Bu xaqta bez Kanada tatarlarınıñ internet säxifäsennän beldek. Saban tuyı 1nçe iyüldä, Torontonıñ şähär parkında bulası ikän. Şuşı uq sayt, Kanada tatarlarınıñ räsmi töstä oyışma terkäp, aña «Berdämlek» digän isem birep, yaña sıyfatta eşli başlawı xaqında xäbär itä. Oyışmanıñ citäkçese -Tahir Ğaniev. Kanada tatarları saytı www.westgrps.com/files/test%5Fsite/index_ru.htm adresında urnaşqan.

Bikä Timerova.

XS
SM
MD
LG