Accessibility links

шимбә, 10 декабрь 2016, Казан вакыты 14:01

Yäşlär forumı : virtual millät tözergä genä qalamı?


Zamança kommunaktsiä çaraları temasın tikşerüçe seksiädä tatar matbuğatında eşläwçe xäbärçelär, İnternet säxifälären alıp baruçı keşelär, yäşlär oyışmaları citäkçeläre qatnaştı. Başqortstan tatarları delegatsiäse küpläp kilgän ide, Perm ölkäseneñ Barda rayonı wäkilläre, Latviä häm Litva tatar cämğiätlärenä yöreçe yäşlär, İcaw, Samara, Çallı, Alabuğa, Älmät tatar yegetläre- qızları da buldı. Seksiädä söyläşü TNV tele-radio kompaniäseneñ mömkinlekläre häm Rusiä, yıraq çit illärdä taraluyı turındağı temadan başlanıp kitte. Annan soñ, Tatmedia agentlığı wäkile Tatarstan mäğlümat çaraları turında ğömümi mäğlümat birde. Yaponiädä yäşäwçe Qazan jurnalistı Larisa Usmanova citdi fänni çığış yasadı. Ul tatarlarğa global çeltärgä virtual millät tözergä, virtual dönyada saqlanıp qalırğa bula, digän qızıqlı täqdim yañğırattı. «Tatarstan» jurnalınıñ baş möxärrire Rifat Fattaxov virtual tatar dönyası turındağı xıyallardan real tormıştağı problemalarğa qaytardı. «Tatarstan» jurnalınıñ baş möxärire kütärgän temanı «İdel» yäşlär jurnalınıñ xäbärçese dä däwam itte, çönki töp räsmi jurnalda ğına tügel, yäşlär jurnalında da näq şuşı akça citmäw, reklama birelämäw, milli kadrlar bulmaw kebek problemalar kisken tora. Şuña ul rezolyutsiägä tatar yäşlär jurnalınıñ mäsälälärenä dä iğtibar kürsätergä, digän cömläne kertergä soradı. İnternetta häm real tormışta eşläwçe yäşlärdän Mäskäw qızı Adil İlyasova söyläde. Ul problemalar quyudan tuqtap, alarnı xäl itügä küçärgä waqıt dide. Seksiädän soñ rezolyutsiä qabul itelde. Anda tatar mäğlümat çaralarına tatar yäşläre öçen maxsus säxifälärne açırğa täqdim itü, internet säxifälärdä milli üzañnı tärbiäläw maqsatın bereçne urınğa quyarğa, Tatar kongressı qarşında yäş tatar jurnalistlar assotsiatsiäsen tözergä, tatar yäşläre öçen zamança cırlar, klip, köylär cıyıntıqların buşlay taratırğa häm başqa mäsälälär kertelde.



Bikä Timerova.

XS
SM
MD
LG