Accessibility links

пәнҗешәмбе, 8 декабрь 2016, Казан вакыты 03:09

Tatarstanda yäşlär parlamentı oyıştı


Küptän kötelgän, wäğdä itelgän, küp kenä ictimaği oyışmalar kütärep çıqqan yäşlär parlamentı ideyası, nihayät, tormışqa aştı. Anıñ «Rusiä Yäşlär köne» belän bergä turı kilüe, waqiğağa bäyräm ruxın östäde. Şulay itep, Tatarstan däwlät şurasınıñ keçe zalında Tatarstan rayonnarınnan, ictimaği oyışmalardan saylanğan barlığı 70 yaqın delegat cıyıldı. Alar Däwlät Şurası qarşındağı İctimaği yäşlär palatasınıñ 1nçe utırışında qatnaştı. Eş näq zurlar parlamentında kebek oyıştırğan ide. Yäşlär wäkillärenä waqıtlıça tanıqlıqlar birelde, Däwlät Şurasınıñ xezmätkärläre eş käğäzlären tarattı. Yäşlär palatasın räise saylanğançı, utırışnı Däwlät Şurasınıñ iñ yäş deputatı Dmitriy Vtorov alıp bardı. Palatanıñ berençe utırışın oyıştıru belän yäşlär ministrlığı nıqlap şöğellände, şuña kürä, räis, anıñ urınbasarları häm komissiä räislärenä täqdim itelüçelär isemlege alar tarafınnan aldan uq äzerlänep quyılğan ide. Yäşlär palatası äğzäläre ul keşelärne, al’ternativasız räweştä, bik tiz arada raslap quydı. Şulay itep, «Yäşlär berdämlege» säyäsi-ictimağıy xäräkäte wäkile İldar Berxeev Yäşlär palatasınıñ räise buldı. Anıñ urınbasarı itep, şul uq xäräkät wäkile, Marat Buxarayıv häm Yäşel Üzännän gimnaziä uqıtuçısı Marina Batova saylandı. Şulay uq, xoquqi mäs’älälär, sotsial yaqlaw, mäğärif, sport häm yal itü problemaların bağuçı komissiälär oyıştırıldı. Alarğa da yäşlär ministrlığı xezmätkäre, KVN komandası citäkçese, Älmät yuğarı uqu yortı prorektorı häm KamAZ şirkäte xezmätkäre saylandı.

Tatar yäşlärennän älege ictimaği palatada «Azatlıq» yäşlär berlege häm Tatar yäşlär assotsiätsiäsennän 2 deputat eşläyäçäk. Tağın ber keşe – yähüd yäşlär oyışmasınnan saylanğan. Alar anda tatar häm başqa urıs bulmağan yäşlärneñ problemaların kütärergä uylap tora. Däwlät Şurası qarşındağı yäşlär palatasına, «Berdäm Rusiä» firqäseneñ«Komsomolı»nnan qala, «Tatarstan-yaña ğasır» xäräkäteneñ yäşlär qanatı äğzäläre, yäş ğalimnär häm belgeçlär xäräkäte wäkilläre, studentlar hönär berlekläre, yäşlär belän eşläw komitetları xezmätkärläre, yuğarı uqu yortları uqıtuçıları kerde. Yäşlär palatasınıñ kiläse utırışı, sentäber ayına bilgelände, ä aña qadar deputatlarğa Tatarstannıñ «Yäşlär turında» digän qanunına tözätmälär äzerläw kebek «öy eşe» birelde.

Bikä Timerova.

XS
SM
MD
LG