Accessibility links

җомга, 9 декабрь 2016, Казан вакыты 18:34

Tatar yäşlär Forumı tämamlandı


Tatar yäşlär könnäre inde 10 yıldan artıq ütkärelsä dä, Kongress, forum däräcäsendäge andıy zur cıyınıñ bulğanı yuq ide. Şuña da, yäşlär aña zur ömetlär bağlap kilde. 4 kön ütep kitte, ä äytäse süzlär qaldı. Şuña, yäşlär alğa taba xatlarda, internet çeltärendä süzlären däwam itärä buldı. Forumnıñ yabılu kiçäsendä kümäkläşep räsemgä töşü häm ber-berse belän adreslar almaşu küreneşläre adım sayın oçrap tordı. Sawbullaşu tantanası «Aq Bars» Yäşlär üzägendä ütkärelde. Anda ozın, ozaq itep notıqlar söylänmäde, yäşlär cırlap, biep talantların kürsätte.

Konsert Qazannıñ häm forum qunaqları arasınnan bulğan başqaruçılarnıñ çığışları belän aralaştırılıp bardı. Monda, här töbäkneñ üzençälege açılıp, tatar dönyası niqädär kiñ häm törle-törle buluın kürergä mömkinlek tudı. Taşkent tatarları delegatsiä niqädär zur bulğan kebek, şundıy uq yışlıq belän çığışlar yasadı. Alar operada cırlawçı zur sänğät ähelläre, konservatoriä uquçıları, yäş kompozitorlar bulıp çıqtı. Üzbäk häm ğäräp biülären dä biep kürsätte, xalıq cırların da başqardı.

Ästerxan häm Samara ölkäläre qızları da cırğa häwäs ikän. Alar Tatarstan estradası repertuarınnan berär cır başqardı. Qazaqstan delegatsiäseneñ çığışı üzençälekle buldı. Qazaqstan xalıqları assambleyası wäkile, Alma-ata tatarları isemennän kongress räise Rinat Zakirovqa qazaq çapanın büläk itte. Ä Qazaqstan tatarları wäkile, yäş kenä opera cırçısı Färğät, milli ozın köylärneñ bersen cırlap kürsätte.

Baqıdan kilgän qızlar törek feskaların kiep, tatar biüen biede, yäş jurnalist İlmira tutaş, «Ezlädem bäğrem sine» cırın djazğa oxşatıp başqardı. «Ay qay» ansambleneñ çığışı isä Mäskäw tatar yegetläre- qızlarıñnıñ, Nicğar häm Finländiä tatarları belän nıqlı elemtädä toruın kürsätte. Çönki alarnıñ süz äyteleşe Finländiä tatarlarınıñ söylämenä tartım ide. Konsert Üzbäkstan tatarları yazğan, yaña «Tatar xalqı» cırın belän tämamlandı. Anı törle ildän kilgän, törle xalıq milli kiemnären kigän tatar yäşläre bergäläp başqardı.

Bikä Timerova.

XS
SM
MD
LG