Accessibility links

Yäşlär forumı niçek ütte?


Küptän kötelgän milli cıyın - Bötendönya tatar yäşläre forumı tämamlandı. Düşämbe könne anda qatnaşuçılar yäşägän illärenä, töbäklärenä taraldı. Forumnıñ programması bik bay häm mäşäqätle buldı. Anıñ qısalarında törle tarmaqlar buyınça ütkärelgän seksiä utırışları, tatar milläteneñ üseş strategiäsenä bağışlanğan fänni konferensiä, icadi oçraşular, konsertlar ütte. Şimbä könne forumda qatnaşuçılar kürşe Mari respublikası başqalası Yoşkar-Olada oyıştırılğan federal' Sabantuyğa bardılar. Bu Sabantuyı ğadi tügel. Çönki ul Mari respublikası häm Yoşkar-Ola şähäre xakimiätennän başqa, Bötendönya tatar kongressı Başqarma komitetı, Rusiä tatarlarınıñ milli-mädäni moxtariätläre qatnaşlığında ütä. Qazandağı yäşlär forumında qatnaşuçılarnıñ da anda säyäxäte, milli cämäğätçelekneñ nindi zur eşlärgä alınuın kürsätü, ğibrät alu öçen dä oyıştırılğandır.
Şimbä kiçendä tatar yäşläre şaqtıy qatlawlı säyäxättän qaytıp, xälsezlänep yığılğannar disägez, yalğışasız. Berniçä töbäk wäkilläre kiçen üzläre yäşägän profilaktoriy yanındağı baqçağa çığıp, forumda äytergä ölgermägän yäşlär mäs’äläläre turında fiker alışunı däwam ittergännär. Forum seksiäläreneñ häm plenar utırışnıñ qararları da centekläp öyränügä layıqlı. Bötendönya tatar yäşläre forumınıñ Başqarma komitetı räise itep 19 yäşlek student Azat İslaev saylanğan. TİSBİ, eşquarlıq yärdäm itü institutında uquçı bu yeget forumnıñ kötelmägän häm qızıqlı açışı buldı. Yäkşämbe könne yäşlär Bolğarğa säyäxät qıldı. Ä kiçen Aq Bars tamaşalar üzägendä forumnıñ yabılu tantanası ütte. Ul yäşlärçä icat häm cır, biyu tamaşası törendä oyıştırılğan ide.
Qazaxstan wäkilläre Tatarstanda
Düşämbe könne Qazaxstannıñ industriä häm sänäğät ministrı Adılbäk Caksıbekov citäkçelegendäge eşlekle delegatsiä Tatarstanğa kilde. Qazaxstan iqtisatçıların Çallı yanındağı Begiş hawa mäydanında Tatarstannıñ säwdä häm tışqı elemtälär ministrı Xafiz Salixov, Çallı başlığı İldar Xalikov, kamAZ citäkçese Sergey Kogogin qarşıladılar. Kürenep tora, Qazaxstan häm Tatarstan iqtisadı xezmättäşlekne tağın da kiñäytergä cıyına. Ä sişämbe könne Qazanğa Qazaxstan prezidentı Nursoltan Nazarbaev kiläçäk. Bu atnada, Qazanda şulay uq, gumanitar mäs’älälärgä qaralğan çaralar, Nikolay Gumilev konferensiäse dä ütäçäk.
Xokkeyçılarğa yaña prezident
İqtisad häm sport belän bäyle ber möhim yañalıq. Düşämbe könne Tatarstan prezidentı Mintimer Şäymiev Aq Bars xokkey klubı häm respublikanıñ xokkey federatsiäse citäkçeläre belän oçraştı. Bu oçraşuda moña qädär Aq Bars klubınıñ häm federatsiäneñ citäkçese bulğan Färit Möxämmätşin, premyer-ministr Röstäm Miñnexanov ta qatnaştı. Biredä Aq Bars klubı häm xokkey federatsiäseneñ prezidentı citäkçese vazıyfaların Tatneft' berläşmäse general' direktorı Şäfäğät Taxautdinovqa tapşırıluı turında mäğlüm buldı.
Rimzil' Wäli, Qazan.
XS
SM
MD
LG