Sember ölkäsendä 15500 bala urta mäktäp tämamladı. Mäktäplärdä uzğan çığarılış bäyrämnärennän tış, Lenin memorial' üzägendä ölkäküläm çara da uzdı – mäktäpne altın yäki kömeş midal belän tämämlağannarnı gubernator qotlawı ğadätkä kerep bara. Vladimir Şamanovnıñ Mäskäwdä buluı säbäple, anıñ täbrik xatın berençe urınbasarı Mixail Şkanov uqıdı. Anda ber täğbir ayıruça iğtibarğa layık: “Fidaqar xezmätegez öçen, Sezgä, istälek bulsın dip, Urıs tarixı kitabı büläk itäm häm bu tarixta sez dä üz ezegezne qaldırırsız, dip ömetlänäm”.
Midalğa layık buluçılar arasında tatar balaları da baytaq ide. Dimäk, alarnıñ da urıs tarixında üz ezlären qaldıraçaqlarına ömetlänergä kiräk. Ttar tarixı bulmağanğadır inde...
Mäktäp tämämlawçılar arasında şähär şartlarında 10 yıl buyı ayırım tatar sıynıflarında uqığannar da bar. Mondıy sıynıflar Dimitroğrad şähäreneñ 9-nçı, Sember qalasınıñ 55, 68, 75-nçe mäktäplärendä bar. 28-nçe mäktäptä dä yıl sayın berençe sıynıfta tatar balaları ayırım tuplana, läkin 9-nçı sıynıfnı tämämlağaç, kübese texnikumnarğa kitä, häm şunıñ näticäsendä az sanlı qalğan tatar sıynıfları 10 häm 11 tarqatıla, tatar balaları ğomum sıynıflarğa başqalarğa quşılalar.
Ölkä üzägeneñ Yaña şähär digän öleşe mäktäplärendä möğallimä Ğaliäbänu Zinnätullina din däresläre alıp bara. Ul bu eşen cäyge yal waqıtlarında da däwam itärgä tırışa, läkin Sember ölkäse kiñleklärendä moña qarşı törle tozaqlar qorıla. Şunlıqtan ul Tatarstan cirlegendä oyıştıra mondıy çaralarnı. Bıyıl Bua qalasına 60 bala belän yalğa cıyına Ğaliäbänu xanım.
Şulay uq İske Qulatqı rayonınıñ Cämiğ mäçete qaramağında üz rayonı balaları öçen möxtäsib Änwär xäzrät Adelşin sälämätländerü häm dini yal lager'ları oyıştıra.
“Azatlıq” radiosı, Ayrat İbrahim, Sember
“Azatlıq” radiosı, Ayrat İbrahim, Sember
