Accessibility links

Кайнар хәбәр

Gata Kamski yañadan şaxmatqa qayta


Amerika massaküläm çaraları şaxmat yaratuçıları öçen şatlıqlı ber xäbär tarattı – Gata Kamski yañadan şaxmat uynıy başlağan. Monıñ turında New York şähäreneñ ber sport jurnalistı Sam Sloan xäbär itä. İyün ayınıñ ikençe yartısında Gata Kamski New Yorkta atna buyı barğan masterlar turnirında uynağan. Gata Kamski Amerikanıñ şaxmat çempionı bulsa da, Amerika şaxmat federatsiäseneñ turnirlarında un yıl inde, 1994 yıldan birle uynağanı yuq ide. Gata Kamski Philadelphia şähärendä 2 iyüldä başlanaçaq dönyanıñ iñ zur açıq şaxmat turnirında uynarğa cıyına dip sanıylar. New York turnirında öç uyınnı otıp, ber uyınnı ottıruı Kamskinıñ üzeneñ elekke formasına älegä kermägänlegen kürsätä. Ämma, xäzer ul Amerikanıñ iñ yaxşı şaxmat uynawçısı dip sanalmasa da, hiçşiksez, Amerikanıñ iñ yaxşı şaxmatçılarınıñ berse bulıp qala. New York turnirında Gata Kamski berençe uyında Latviädan kilgän grossmeister Daniel Fridman belän uynağan. Uyın başında uq naçar pozitsiäğa eläkkäç, Gata ottırğan. Ämma turnir barışında yulına oçrağan tağı 3 şaxmat masterın ul ciñgän. Üz waqıtında millättäşebez Gata Kamski bötendönya şaxmatlarında öçençe reytinglı şaxmatçı ide. 1996 yılda pretendentlar matçın grossmeyster Anatoliy Karpovka ottırğaç, Gata şaxmat uyının taşladı häm xärbi meditsina akademiäsı studentı buldı. Şulsın da äytergä kiräk, tizdän Gata vraç buludan baş tarttı, meditsinanı taşlap, yuridik institutqa uqırğa kerde häm bıyıl may ayında yurist diplomı aldı. 1999 yılda Gata Kamski qısqa ğına waqıtqa şaxmatlarğa qayta häm FİDE versiäsı buyınça dönya çempionı titulı öçen grossmeister Aleksandr Khalifman belän öç uyınnan torğan matç uynıy. Berençe uyınnı ota, ämma tağı ike uyınnı ottıra. Şunnan soñ 5 yıl ütkäç kenä Gata yañadan şaxmatlarğa qayttı. Kamski yäş äle, ämma şundıy ozaq şaxmat uynamıyça, yañadan üzeneñ elekke formasına qaytırmı, yuqmı, ulsı bilgesez. Niçek kenä bulmasın, tatar milläte öçen Gata Kamskinıñ şaxmat dönyasına qaytuı anıñ berkemgä bilgesez Amerika yuristı bulıp eşläwennän yaxşıraq. Hiçşiksez, tatarlar äle Gatanıñ uñışları belän ğorurlanırlar.

Azatlıq radiosı öçen İrek Bikkinin
XS
SM
MD
LG