Accessibility links

җомга, 9 декабрь 2016, Казан вакыты 12:51

Qazaqlar belän tatarlarnı Lev Gumilev mirası berläşterä


Anıñ Yevraziäçelek idealarına bağışlanğan konferensiädä Tatarstan häm Qazaqstan prezidentları çığış yasağanda, şulay dip äyttelär. Mintimer Şäymiev häm Nursoltan Nazarbayev ta, Gumilev mirasına ber uq qaraş belderdelär. Ul, Altın Urda çorına, Yevropa häm Aziä xalıqlarına sovet ideologiäsennän azat bulğan qaraş beldergän qıyu ğalimnärneñ berse, dielde çığışlarda. Aldanraq çığış yasağan Tatarstan Prezidentı ber täqdim kertte. Rusiä häm Qazaqstan ğalimnäreneñ tırışlıqların ber yünäleşkä cibärep, Yevraziä xalıqları tarixın obyektiv itep yazar waqıt citte, dide ul. Mintimer Şäymievtan soñ Qazaqstan Prezidentı Nursoltan Nazarbaev süz aldı. Ul başta ike respublikanıñ fänni cämäğätçelegen qazaqça sälämläde, annarı urısçağa küçte. Ul, üz çığışında, global’läşü çorında bezgä yevraziäçelekkä yañadan äylänep qaytırğa turı kilä, dip belderde. Törki xalıqlarnıñ, däwlätlärneñ berdämläşep eşläwe genä, däwlätçelekne, dinne, telne global’läşü waqıtında saqlap qala alaçaq, dide Nursoltan Nazarbaev. Çığışnıñ axırında ul tatarçağa küçte, häm Qazaqstan xalqınnan säläm citkerde. Fänni konferensiäneñ seksiälärendä Tatarstan häm Qazaqstan ğalimnäre Yevraziäçelek konsepsiälären tikşerde. Mäsälän, Gumilev isemendäge universitet professorı Xangeldı Abacanov Nazarbayevnıñ yevraziäçelek konsepsiäse xaqında çığış yasasa, etnologik monitoring üzäge başlığı Damir İsxakov, Yevropa Aziä xalıqlarnıñ berläşüe Tatarstannan niçek kürenä, digän temağa söyläde. Şulay uq, yevraziäçelekneñ mädäniät, tarix, ädäbiät belän bäyläneşläre dä tikşerelde. Yevraziä berdämlegendä tel mäs’äläse xaqındağı sorawıbızğa niçek bulır ikän, dip Qazaqstannıñ Milli kitapxanä citäkçese Auezov Murat äfände cawap birde. Murat äfände 19 ğasırda Yevropa häm Aziä xalıqlarınıñ urtaq törki teldä söyläşkänen iskä aldı, xäzer bu wazifanı urıs tele başqara, dide. Älege xalıqara konferensiäne oyıştıruçılar, ike däwlätneñ fänni cämäğätçelege qabul itkän qararlar häm äytelgän fikerlär, däwlät eşlekleläre, säyäsätçelär öçen faydalı bulır dip ömetlänä.

Bikä Timerova.

XS
SM
MD
LG