Rusiä Tışqı eşlär ministrı Sergei Lavrov Qatar mäxkämäse tarafınnan ğömerlek törmägä xökem itelgän ike Rusiä agentı ğäyepsez, alarnı azat itü eşe däwam itäçäk dip belderde. Anatoli Bilaşkov belän Vasili Pokçov fivral ayında Qatarda sörgendä yäşägän Çeçnyanıñ elekke prezidentı Zälimxan Yandarbievnı üterüdä ğäyeplänä. Bügen Qatar mäxkämäse alarnı ğömerlekkä, başqaça äytkändä 25 yıl törmägä xökem itte. Lavrov süzlärençä, Rusiä Qatar mäxkämäse qararın ixtiram itsä dä, Rusiä advokatları şikäyät belderäçäk. Xökem qararın uqığanda Qatar xäkime İbrahim Salih Äl-Näsf bu üterü artında Rusiä citäkşelege toruın äytte. Räsmi Mäskäw qulğa alınğan keşelärneñ küzläw xezmätkärläre buluın tanısa da, alarnıñ Yandarbievnı üterügä qatışı buluın kire qağa.
