Accessibility links

җомга, 9 декабрь 2016, Казан вакыты 20:26

Qazanlılar narkota belän köräşä


İñ soñğı mäğlümatlärğä qarağanda, Tatarstanda narkomaniä çire belän 7 meñnän artıq keşe awırıy, şularnıñ biş meñgä yaqını 15-29 yäşkä qädärge yäşlär. Statistika buyınça här narkoman östäwenä tağın dürt-biş keşene, ä narkotik satuçılar xätta 17şär keşene narkotağa cälep itärgä mömkin. Soñğı yıllarda narkomaniä afätennän ülüçelär sanı da artqan. Narkomaniädän ülüçelärneñ 60% qazanlılar. Ämma narkomaniä şähär çire genä dä tügel äle, soñğı yıllarda ul xätta awıl tiräsendä dä şaqtıy kiñ taralğan çir.
İnde nişlärgä? Ber Tatarstanda ğına taralğan afät tügel bu. Läkin tatarlar, möselmannar mondıy bozıqlıqtan çitläşergä tieş kebek. Tatarstanda bu bälä belän köräşälär, qul quşırıp qına utırmıylar. Xalıqara narkomaniägä qarşı köräş köne uñayınnan yasalğan möräcäğättä soñğı yıllarda respublikada zaman çirenä bağışlap oyıştırılğan çaralar turında äytelde. Respublikada inde 5 yıl däwamında narkotiklarğa qarşı maxsus programma eşläp kilä. Programmanıñ berençe öç yıllıq eşe näticäsendä 12 meñ keşe narkoman isemennän qotılğan. Älege çaranıñ nigezendä narkomaniä çireneñ profilaktikası, döres tärbiä, sälämät yäşäw räweşe kebek bik möhim töşençälär isäpkä alınğan. Mäktäplärgä, lager'larğa yäşlär yanına säyäsätçelär, artistlar, sportsmennar çaqırtıp, yäşlärne qızıqsındıru, cälep itü dä älege programmalarda qaralğan. Häm inde tanılğan keşelär belän aralaşu ğına yärdäm itmägännär öçen maxsus şifaxanälär eşläp kilä.
İñ ähämiätlese, xalıqnıñ fikeren, şuşı afätkä qarata tiskäre mönäsäbäten buldıru. Narkomannar üzläre bik astırtın bula, alarnı tabıp, döres yulğa çığaru bik çiten. Qazannıñ üzäk uramnarınıñ bersendä dä ğadi narkomannı tabıp bulmadı. Alar yäşerenä, üzläreneñ bäläsen tanımıy.
Belgeçlär, narkota qapqanına elägüçelärne qıyırsıtu döres tügel, dip sanıy. Mondıy bälägä yaqın yörüçe yäşlär belän elemtä urnaştıru bik qatlawlı.
Yaña ğına ütkän tügäräk östäl artında söyläşüdä narkomannar öçen sotsial'-reabilitatsiä üzäge açu kiräklege turında äytelde. Bu üzäkne kiläse yılda uq açarğa kiräk, dip sanıy tabiplar. Bügen bez xökümätneñ narkomaniägä qarşı köräş bülege mödire Roza Sadıyqovadan şunıñ turında beleştek. Reabilitatsiä üzäge berençe awırularnı kiläse yılnıñ urtasında qabul itärgä tieş. Bik borçığan mäs'älä bar. Rusiä xökümäteneñ qararı belän saqlarğa röxsät itelgän narkotiklarnıñ küläme arttırıla. Dimäk zäxmätle ağunı yörtüçelärgä mömkinleklär arta.
Bügenge köndä cämäğätçelekneñ sälämätlege häm küñele narkomaniä isemle qıl östendä torğanda mäçet xezmätkärläre dä bitaraf qala almıy. Mäçetlärdä küp kenä xalıq narkomannarnıñ isän-iminlege, älege afättän qotıluı öçen doğa uqıylar. Şuşı könnärdä “Bolğar” mäçetendä uzğan oçraşuda İl'dus xäzrät Faiz narkomaniä turında äytkändä, Qor’än täfsirennän özek kiterde. Dusqa ğına tügel, xätta doşmanğa da üzeñ qullanmağan närsäne birergä yaramıy, dip äytelä Qor’än kitabında.
Al'bina Zäynulla, Qazan.

XS
SM
MD
LG