Accessibility links

якшәмбе, 11 декабрь 2016, Казан вакыты 07:17

Salım ministerlegeneñ häm mäxkämäneñ qararı Yukosnı bölgenlekkä töşerä ala.


Mäskäv arbitratsiä mäxkämäse, Salım Ministerlegeneñ 6 miliard 800 milion dolarlıq salım burıçın tüläven taläp itüe säbäple, Yukosnıñ mal-mölkäten tuñdıru qararın rasladı. Şirkätneñ süzçese mäxkämä qararı şirkätne bölgenlekkä töşerä ala dip beldergännän soñ, Yukos aksiälärenneñ bäyäse yaqınça 20 protsentqa töşte.

Yukos 2000-nçe yıl öçen salım burıçın tülävne kiçekterü, öleşläp tüläv yaki milken satu öçen röxsät alırğa tırışqan ber vaqıtta, Salım Ministerlege bu märtäbä 2001-nçe yıl öçen dä şundıy uq miqdarda östämä salım tüläv taläbe belän çıqtı. Yukos elegeräk ük şartlar yomışartılmağan xäldä şirkätneñ bölgenlekkä töşüe ixtimal dip belderep kilde. Yukos berençe salım burıçın tüläv öçen Sibnefttege aksiälären satu öçen röxsät soradı. Röxsät soradı, çönki anıñ barlıq mal-mölkäte, banka xisapları mäxkämä qararı belän tuñdırılğan ide. Añıñ Sibnefttäge aksiäläreneñ bäyäse yaqınça 4 miliard dolar qimmätendä dip xisaplana. Annan başqa Yukosnıñ aqçalata ber miliard doları bar dip belderelä. Yukosnıñ barlıq mal-mölkäte 30 miliard dolar tiräsendä ikän. Dimäk Yukos üzenä xäräkät ireklege birelsä, mal-mölkäten tuñdıru qararı köçtän çığarılsa häm Salım Ministerlege , östämä taläplär quymasa, burıçların tülärlek xäldä. Qayber küzätüçelär Salım ministerlege 203-nçe yıl öçen dä östämä salım taläbe quyaçaq dip farazlıylar. Şulay itep Yukosqa 10 miliard dolar caması tülärgä kiräk bulaçaq kebek. Yukos süzçese Aleksander Şadrin Salım Ministerlegeneñ yaña taläbe turında bolay dide.

Audio

Ul şulay uq banka xisapları belän milkäteneñ tuñdırıluı , şirkätkä çın qurqınıç bulıp tora häm bu bankrotlıqqa alıp baraçaq dip belderde. Bu belderüdän soñ Yukos aksiäläre qimmäteneñ 20 protsentın yuğalttı. Ä inde prezident Putin küptän tügel genä xökümäteneñ Yukos kebek şirkätlärne cimerergä telämäven äytkän de. Läkin, anıñ süzläre belän xökümäteneñ eşçänlege arasında upqın bar. İnde Salım Ministerlege prezidentnıñ telägenä qarşı üz beldegençä xäräkät itär dip ber qatlı keşelär genä ışana ala. Älbättä, Putin bu väğdäsen ütämäs öçen açıq işek tä qaldırdı. İmeş, soñğı qarar mäxkämäneke. Küpkenä küzätüçelär, Yukosqa qarşı kampaniäneñ tübendä salım burıçı yaki başqa finans taläplär tormıy, töp säbäp Xadarkovskiynıñ säyäsätkä qatnaşıp , prezident Putingä qarşı çığuı buldı digän fikerdälär. Ul salım tülämävdä häm xärämläşüdä ğäyeple dip tabılğan xäldä, aña 10 yılğa qädäre tärmä cazası birelä ala.

Färit İdelle, Praga.
XS
SM
MD
LG