2 yül küpsanlı rusiälelär öçen şaqtıy zur üzgäreşlär alıp kiläçäk kön. Şul isäptän, tatarstanlılarğa da. Çönki comğa könne Rusiä Däwlät Dumasında taşlamalarnı aqçalar belän alıştıru xaqındağı qanun berençe uqılışta tikşerelde. Älege qanunnı Dumanıñ küpçelegen täşkil itkän Edinaya Rossiya firkäse deputatları yaqlıy. Şuña da, bu qanun comğa könne berençe uqılışta qabul itelde. Gärçä, Kommunistlar häm Rodina firkäse wäkilläreneñ 2 yüldä uzğan utırışta anı qaramasqa digän täqdime bulsa da. Taşlamalar belän faydalanuçılar öçen alarnı aqçalata birü xaqındağı qanun 100 million rusiälegä qağıla. Respublikada törle taşlamalar belän ber millionnan artıq keşe faydalana. Alarnı tä’min itügä bıltır mäsälän 3,5 milliard sum aqça totılğan. Taşlamalar, alarnı aqça belän alıştıru turında soñğı waqıtta bik küp süz yörde. Läkin qaysı taşlamalar betä, qaysıları qala, alar urınına küpme aqça tülänäçäge turında tulı mäğlümät älegä xätle yuq.
Citmäsä, taşlamalar urınına aqçalarnı xäzer cirle byudjettan tüliäçäklär. Bu küplärdä ayıruça yarlı bulğan töbäklärdä tieşle külämdä aqçalata tüläwlärne birep baruda şik tudıra. Taşlamalarğa iä buluçı şuşı xätle xalıqnıñ citmäsä bik bay bulmawın, ä yış qına yarlı buluın istä totqanda, alda äytelgän qanunnıñ ğadi xalıq arasında zur qızıqsınu uyatuı añlaşıla. Tatarstanlılar älege qanun xaqında törle fikerdä tora. Birelgän taşlamalar belän faydalanırğa mömkinçelekläre kübräk bulğan şähär xalqı taşlamalarnıñ aqçağa almaştırıluın telämi. Awıl xalqınıñ küpçelege isä, bezneñ öçen aqçalata tüläwlär naçar bulmas ide, digän fikerdä.
Tatarstanda federal’ taşlamalardan tış bügenge köndä respublika birä torğannarı da bar. Alarnı nindi yazmış kötä? Älegä respublika xökümätendä bu sorawğa cawap birergä äzer tügellär. Alar aqçağa alıştırılaçaqmı, yuqmı – bu xaqta xäzer fikerläşülär bara.
Gölnaz İlgizär
