Accessibility links

чәршәмбе, 7 декабрь 2016, Казан вакыты 13:43

Tatnet : forumnan soñ yäşlär berläşü omtılışın yasadı


Qazandağı Tatar yäşlär Forumı ütep kitte, ämma virtual dönyada ul haman da däwam itä şikelle. İnternettağı tatforum.att.tt adresında urnaşqan forumda yäşlär cıyınınıñ näticäläre xaqında fiker alışular bara. Tatar yäşläreneñ yulbaşçısı şäxese tiräsendä dä gäp quyırıp aldı. Forum kiläçäktä niçek atalır, nindi yünäleştä eş alıp barır, digän temalarğa da fiker alışular buldı. İñ qızığı, Qazanda bulmağan, läkin eçtälegen bik beläse kilgän yäşlär, seksiä häm plenar utırışlarnıñ rezolyutsiälären ütenep soradı, ämma alarnı forumğa urnaştıruçı bulmadı. Qazandağı forumçılar, bu eşne soñraq başqarırğa wäğdä ittelär. Kötä torğaç, forumçılar, äy yarar, rezolütsiädän başqa da, kiläçäktä närsä eşlärgä kiräge xaqında söyläşerbez, digän näticägä kildelär häm eşkä totındılar. Berençedän, Mäskäw yäşläre tatar yegetlären-qızların berläşterü omtılışın yasadı. Mäsälän, Mäskäw avtonomiäse wäkile, Märyäm tutaş, Yahoo portalında oyıştırılğan «tatarlar» törkemenä xat cibärep, anı Almata tatarlarınıqı itep kenä tügel ğına tügel, başqa il, respublika häm şähärlärdä yäşäwçe tatarlarnıñ xat alışu törkemenä qädär kiñäyergä täqdim itte. Märyäm tutaş, Qazandağı forumda yazıp alğan elektron-xat adresların kertep, urtağa salıp söyläşkän süzlärne, internet tizlege belän böten tatar yäşlärenä taratırğa täqdim itä. Yahoodağı tatarlar törkeme xucaları bu täqdimne qabul itä. Bu xezmättäşlektän närsä kilep çığır, yaqın kiläçäktä kürerbez. Yahoo xat törkemenä çığu öçen iñ qısqa yul : tatarlar.forever.kz internet säxifäsenä kerep, «tatarlar»törkemenä yazılu.

Yäşlär forumınıñ idärä äğzäse, Mäskäw yegete Lenar Raxmanov, tağın başqa törleräk fiker belän dä «Azatlıq» radiosına xat yullağan ide. Ul, forumdağı söyläşülärne däwamı itep, Qazaqstan tatar yäşlärenä qaşılmıyça, ä yaña tatar xat törkemen buldırırğa telibez, dip yazdı. Bu idea tormışqa aşırılırmı yuqmı, nindi adresta yazılırğa mömkin bulır, kiläse tapşırularnıñ bersendä xäbär itärbez.

Tatnet yañalığı. Windows sisteması tatarça bulaçaqmı? Microsoft şirkäte soñğı Windwos XP sistemasınıñ, yaqın arada qazaq telendäge variantın çığarırğa cıyına ikän. Bu xaqta tuğan-tel.at.tt saytı xäbär itä. Tatarça komputor sistemaların buldıru turında Tatarstan xakimiätläre tırışlıqlar kürsätmägäç, entuziast yegetlär bu eşkä üzläre alınğan häm sistemanıñ berençe ürnägen latin xärefläre belän yasap quyğan. Suz MİU Multilanguage User Interface yäğni sistemanıñ qullanuçı öçen küreneşe, turında bara. Yegetlär qullanuçı tatarça itep «saqla», «kis», «küçer» kebek boyırıqlar birep sistemasın eşlätä alır, dip ömetlänä. Bu xaqta Tatnetnıñ aldağı çığarılışlarında tulıraq itep söylärbez.

Bikä Timerova.

XS
SM
MD
LG