Accessibility links

якшәмбе, 4 декабрь 2016, Казан вакыты 11:20

Tatar tele statusı turındağı referendumğa ayaq çalular äzerlänä


Elegräk tä xäbär itelüençä, Başqortstan tatar cämägätçelek oyışmaları 19 iyündä ütkärelgän üz cıyınında respublikta tatar telenä dä däwlät tele statusı taläp itü buyınça referendum ütkärügä äzerlek başlarğa qarar itkän ide. Xäzer bu bik möhim häm ğäyät mäşäkätle çarağa äzerlek eşläre başlana. Kiläse atnanıñ sişämbesendä Başqortstan tatar cämägätçelek oyışmaları referendumğa äzerlänä başlaw mäsälälären tikşerü öçen Ufada çirattağı urtaq utırışına cıyıla. 2 iyül könne şul utırışta qaralırğa tieşle kön tärtiben täğayınläw maqsatında, tatar milli xäräkäte liderları ber cıyılış ütkärep aldı. Anda qatnaşuçılar aldağı atna utırışında referendumnı ütkärügä äzerlekne oyıştıraçaq initsiativ törkemneñ sostawın tözüne tämamlarğa kiräk dip kileşte. Bu eşne ozaqqa suzmaw xäyerle. Cıyılışta tatar telenä däwlät tele statusı mäsäläsen kütäräçäk referendumnı ütkärügä äzerlekneñ ciñel genä barmayaçağı assızıqlandı. Xäzerdän ük inde bu çarağa qarşılıq bulaçağı ayırmaçıq bilgele. Tatar oyışmaları referendum ütkärügä äzerlek başlawnı iğlan itep berniçä kön ütügä ük, respubliknıñ iñ yuğarı citäkçeläre tarafınnan saf tatar rayonnarı xaqimiät başlıqların bu referendumğa äzerlekne oyıştıruçı initsiativ törkemgä härtörle ayaq çalırğa, alarğa referendum ütkärügä räsmi nigezlek alu öçen xalıqtan imzalar cıyuğa kirtä qorırğa quşılğan. Qayber mäğlümatlarğa kürä, Başqortstanda tatar telenä däwlät tele statusı alunı maqsat itep quyuçı referendum ütkärügä Rusiä xaqimiätläre dä qarşı ikän. Başqortstan tatarlarınnan kürep, ilneñ başqa töbäklärendä dä şundıy uq çılbır reaqsiäse başlanırğa mömkin dip belderälär ikän Mäskäw türäläre. Niçek kenä bulmasın, tatar milli xäräkäte başlıqları respublikta tatar tele statusı mäsäläsendä xalıq fikeren alunı motlaq ütkärügä ireşäçägenä ışana. Bu xaqta Tatarstannıñ Başqortstandağı Säwdä – iqtisadıy wäkilçelege citäkçese, Başqortstan Tatar kongressı Başqarma qomitetı räise urınbasarı Ramil Bignov ta qatğıy belderä. Ufada 6 iyüldä ütäçäk berlektäge cıyınında tatar oyışmaları citäkçeläre häm wäkilläre referendumğa äzerlekneñ ağımdağı mäsälälären tikşeräçäk tä inde. Tatar cämägätçelek oyışmaları öçen küñelle yañalıq ta bar. Alar üzläreneñ bu kiñäşmäsenä yaña urında oçraşa. Başqala üzägendä alarğa daimi cıyılu öçen, ber binadan uñaylı, irken utırışlar zalı alındı häm ul matur itep tözekländerelde. Moñarçı isä tatar oyışmaları wäkilläre qayda turı kilsä şunda ğına oçraşıp yöri ide. Xäzer inde alarnıñ üz yortı, üz tübäse bar.

XS
SM
MD
LG