Accessibility links

җомга, 9 декабрь 2016, Казан вакыты 12:52

Ğiraqta totıq itep alınğan AQŞ xärbieneñ yazmışı bilgesez


Bügen Ğiraqta totıq itep alınğan çığışı belän Livannan bulğan ber amerikan xärbieneñ xäle turında qarşılıqlı mäğlümatlär kilde. Maxsus köçlär wäkile Wassef Ali Hasoun''nı üzlären Ansar al-Sunna ğaskärläre dip atağan suğışçılar törkeme totqarlağan.

Başta ğaräp televidenie kanalı Äl-Jazeera, suğışçılar totıqnıñ başın kiste, dip xäbär itte. Ämma soñıraq Livan tışqı eşlär ministrı Jean Obeid, Hassoun''nıñ ütererelgän buluın raslamadı. Livannıñ Bağdadtağı konsulı Hassan Hicazi, inde kiçä ük – Hassoun''nı üterdelär, dip beldergän ide. Livan xökümäte şunda uq şuşı ğamälne "dingä, ähläqqa häm keşeçelekkä qarşı" cinäyät dip bäyläp kisken täñqitläp çıqtı.

Ansar al-Sunna suğışçıları Hassoun''nı üterü turında internetta xäbär itkän häm tiz arada anıñ başın kisüne töşergän tasmanı da internetqa quyarğa wağdä itkän bulğan. Ämma äle genä kilgän xäbärlärgä qarağanda şul uq internet säxifäsendä terrorçılar Hassoun''nı üterüne kire qaqqan mäğlümat urnaştırğan.

Hassoun ğailäse şunda uq dönyanıñ törle televideniä kanalları aşa xökümätlärgä Wassefnıñ irekkä çığarıluı öçen quldan kilgänne eşläwne sorap möräcäğät itte. Totıqnıñ bertuğan abıysın tıñlıyq: "Ässälämü-ğaläyküm, dönyadağı böten ilçeleklärgä märäcäğät itäm. Zinhar, tuğanıbıznı qotqarırğa yardäm itegez. Ul – üz eşen eşlägän amerikan xärbiläreneñ berse ide häm ber keşegä dä naçarlıq eşlämäde. Anıñ ber ğayebe dä yuq. Ul barı tik şundağı başqa keşelär kebek üz eşen başqardı," dide totıqnıñ tuğanı Sami.

Bağdadtağı amerikan xärbiläre dä Hassoun''nıñ üterelgän bulu-bulmawın raslıy almadı. Şulay uq uzğan düşämbedä tağın ber amerikan xärbie – Matthew Maupin''nıñ üterelgän buluı turında xäbärlär bar ide, Amerikan xärbiläre älegä monı da raslıy almadı. Uzğan ayda Ğiraqta Könyaq Korea watandaşınıñ başı kiselde. Amerikan xökümäte häm xärbi köçläre korealını – Jordaniädän Abu Musab al-Zarqawi citäkçelegendäge suğışçılar ütergän, dip belderde. Alarnıñ al-Qaida terror çeltärenä qatnaşı bulğanı mäğlüm.
XS
SM
MD
LG