Accessibility links

Кайнар хәбәр

16 yäşlek Lenar İnternet aşa 80 keşeneñ aqçasın urlağan


Tatar yäşläre arasında şundıyı bula ikän. «Tatarstan yäşläre» gäzite 16 yäşlek Lenar Däwlätşin turında yazıp çıqtı. Ul uqığan Leninogorskiy mäktäbendä uqıtuçılarınnan ğına tügel, institut beterep, diplom alğan qayber belgeçlärdän dä äzerleräk bulıp çıqqan. Läkin malaynıñ danı, däräcäle bäygelärdä ciñü uñayınnan tügel, ä zakon bozu açıqlanu säbäple yıraqlarğa tarala. Şulay itep, malay çaqtan uq komputornı belgän Lenar, soñınnan, internet dönyasına da kerep çuma. Saytlar eşläw belän mawığa başlıy, üzenä dä yasap quya, başqalarğa da ayırım ber tüläw xaqına internetta säxifälär eşli başlıy. Global çeltärdä tüläwlär kredit-kartlar yärdämendä başqarılğanğa kürä, malay tiz arada klientlarnıñ häm başqa internet qullanuçılarnıñ plastik karta açqıçların tabıp, keşe aqçasın urlıy başlağan. Närsägä kiräk bulğan aña aqça disezme? İnternet aşa kitaplar aldırtqan, tanış malaylarğa kesä telefonın alırğa yärdäm itkän, ber tanış qızğa 125 dollarğa çäçkälär kitertkän. Kredit kartalardan aqçalarnıñ yuqqa çığıp baruın kürgän keşelär, bankka möräcäğät itä, banknıñ iminlek xezmäte tikşerü eşlären başlıy. Soñınnan ul eşkä, eçke eşlär ministrlığınıñ yuğarı texnologiälär ölkäsendä qılınğan cinayätlär belän şöğellänüçe bülek belgeçlär dä kilep quşıla. Tikşerü eşläre barğan waqıt eçendä Lenar Däwlätşinnıñ ğämällärennän 80 keşeneñ zıyan kürüe açıqlana, malay barlığı 15 meñ dollarnı üzläştergän bulğan, dip sanıy tikşerüçelär. Ämma, zıyan kürüçelärdän barı 2 genä keşeneñ ğariza birgängä kürä, häm malaynıñ 12 meñ sumnı ğına üzläşterüe dälillängän bulğanğa kürä, qalğan aqçalar yomılıp qala, dip yaza bu xaqta «Tatarstan yäşläre» gäzite. Malayğa 18 yäş tulmağan bula, şuña anıñ öçen cawaplılıqnı äti-änise üzenä ala. Mäxkämä qararı belän, alar 12 meñ sumlıq ştraf tüli dä, eş şunıñ belän tämamlana. Ämma sorawlar qala. Eçke eşlär ministrlığınıñ «K» bülege belgeçläre, Lenar Däwlätşinğa caza äzräk birelde, dip can açısı belän belderülär yasıy. Alarğa bu maqsatqa ireşergä, qanunnarnıñ kamil bulmağanı qomaçaw itä. Andıy aqıllı malaylarnıñ qızlarnıñ sanı könnän- kön arta bara häm bu ölkädäge cinayätçelärneñ artuına qarşı toru awır, çönki totılğan oçraqta da, alarğa berni bulmıy. «Tatarstan yäşläre» xäbärçese, mäs’älägä ikençe yaqtan qarap, şundıy sälätle tatar yegeteneñ belemen ber kemgä dä kiräksenmägängä, ul öyrängän närsälärne izge maqsatta qullanılmağanğa, ükeneç belderä.

Bikä Timerova.

XS
SM
MD
LG