>Uzğan atnada Tatarstannıñ Alekseyıvski rayonı başlığı Aleksey Demidov yaña wazıyfağa - Xisaplaw palatası räise itep bilgelände. Şul uñaydan düşämbe könne Alekseyıvskida xalıq deputatlarınıñ çirattan tış sessiäse uzdı. Anda töp mäs'älä itep yaña xakimiät başlığın bilgeläw qaraldı.
Sessiä eşendä Tatarstan respublikası Prezidentı Mintimer Şäymiev, Prezident Apparatı wäkilläre, rayon sovetınıñ 22 deputatı, törle oyışma citäkçeläre qatnaştı.
Mintimer Şäymiev üz çığışında Alekseyıvski rayonınıñ soñğı yıllarda törle tarmaqlarda üseş aluın bilgeläp uzdı häm bu eşlärdä Demidovnıñ quyğan xezmäte bik zur buluın äytte. «Xisaplaw palatası räise itep tä Aleksey Demidovnı min täqdim ittem, Däwlät Sovetı minem täqdimne bertawıştan xupladı. Demidov üzeneñ tırış, namuslı ikänen rayon xakimiäte bularaq isbatladı. Xisaplaw palatası kebek cawaplı konstitutsion orğanda da ul sınatmas”, - dide Mintimer Şäymiev.
Alekseyıvski rayonında tabış kiterä torğan sänäğät şirqät'läre yuq. Şuña da qaramastan tözeleş tarmağı şaqtıy alğa kitkäne kürenä. Rayonda tözelgän häm tözelep yata torğan binalarnıñ küplege küzgä taşlana. Tağın şunısı uñay küreneş – barlıq binalar da Alekseyıvskinıñ üzendä çığa torğan kirpeçtän tözelä. Kirpeç zavodı küptän tügel genä eşli başlağan. Şuña da qaramastan, Qazannıñ 1000 yıllığı uñayınnan başqalabızda salına torğan binalarnıñ da kübese Alekseyıvski kirpeçennän ikän. Misal itep Federal' salım inspeksiäse, fitnes klubın atarğa bula.Rayonnıñ üzenä kilep kergäç tä qızıl kirpeçtän salınğan xristiannarnıñ mähabät ğibadätxanälärenä tap bulasın. Bolar yanında mäçet berençe qaraşqa yuğalıp qala tösle. Bu möselmannarnıñ açuın kitermime soñ dip qızıqsındım min Alekseyıvski imamı, xaci Röstäm xäzrättän.
Mondıy sorawlarnı küp birälär. Ämma bezneñ maqsatıbız matur bina tözü tügel, ä eşebezne eşläw. Comğa namazlarına keşe küp yöri, mädräsädä balalar uqı.60 protsent tiräse urıs, 30 protsent tiräse tatar xalqı ğömer kiçergän Alekseyıvski rayonınıñ ike yağınnan Qama yılğası cäyılep kitä. Küptän tügel genä açılğan küper Rossiäneñ qayber töbäklärenä sanawlı säğätlärdä barıp citärgä mömkinlek birä. Alekseyıvski citäkçelege älege küperne saluda zur köç quyğan.
Alekseyıvskida urnaşqan Bilärdäge İzge çişmägä kilüçelärneñ sanı da yıldan-yıl arta. Sixät alırğa teläwçelär Bilärdäge Xucalar tawına menep teläklär teli, sädaqälär birä. Qayçandır Bolğar däwläteneñ başqalası bulğan Bilärgä tatarlar ğına tügel, törle millät wäkilläre kilä. Yal itü öçen dä Bilärdä bar mömkinleklär qaralğan. Tatar balaların cıya torğan Sälät tä yıl sayın lager'ların şuşında oyıştıra.Ğomumän Alekseyıvskida yäşlärgä zur iğtibar birergä tırışalar. Bu turıda sessiädä Tatarstan Prezidentı Mintimer Şäymiev ta bilgeläp uzdı. Häm kiläçäktä yaña xakimiät başlığı da Aleksey Demidov yulınnan barır digän teläk belderde. “Çönki yaña citäkçe kandidaturasın qarağanda min quşılmadım, ä Aleksey Demidovqa xäl itärgä röxsät birdem” - dide Mintimer Şäymiev.
Alekseyıvski rayonınıñ yaña xakimiät başlığı itep prezident ukazı belän Vladimir Kozonkov bilgelände. «Ul awıl xucalığı tarmağında şaqtıy ozaq eşlägän keşe. Çığışı belän Alekseyıvski yağınnan. Küp mäs’äläne töptän belep xäl itä”, - dide yaña xakimiät başlığı belän tanıştırğanda Aleksey Demidov.Landış Xarrasova
