Accessibility links

Кайнар хәбәр

Ul'yan ölkäse Qarsun (Qarasu) rayonı Urazovqa awılı mäçeteneñ 120 yıllığı tantanası buldı


Sember ölkäsendä 3 mäçet iñ qarañğı yıllarda da tuqtawsız eşläp kilgän: ölkä üzägendä, İske Mayna rayonı İske Qızılsu awılında häm Qarsun rayonı Saqusqay-Urazovkada. Uzğan comğa könne Saqusqay mäçeteneñ 120 yıllığına bağışlanğan zur çara uzdı. Anda törle ölkälärdä yäşäwçe awıldaşlar, ölkäneñ baytaq awılları imamnarı qatnaştılar. Tatarstannıñ Taw yağı rayonnarı qazıyı, Bua rayonınıñ imam-möxtäsibe Linur xäzrät Sabircanov citäkçelegendä ber törkem din qärdäşlärebez Tatarstannan da kilgän ide. Linur xäzrät Tatarstan diniä idaräse citäkçese Ğosman xäzrätneñ täbrik xatın bäyän itte. Mäçetkä 120 yıl dilär dä bit, süz 1884-yılda yanğan mäçet urınında salınğan yaña bina turında ğına bara. Ä Urazovqa – borınğı awıl. Tik däwlätsez xalıqnıñ tarixı yäşerelgän buluı arqasında, xalıq küñelendä saqlanğan waqiğalar ğına tarix bulıp xezmät itä. Ä bu yanğın – küñeldä tirän saqlanğan. Moña 60 yıl buyı ber ük keşeneñ imam bulıp toruı da säbäpter inde.

Üktäber tüntäreleşenä qädär awılda 3 mäçet eşlägän. Yaña xaqimiätneñ qısuına tüzä almıyça, Xäsän xäzrät çitkä çığıp kitkän. İkençese, İsxaq xäzrät, Sember şifaxanäsendä serle räweştä dönya quyğan. Ä bu mäçet imamı Sabircan xäzrätkä 60 yıl buyı dinebezneñ ömete, xalqıbıznıñ ruxiäte bulıp balqırğa yazğan 1911-yıldan alıp 1871-yılğa qädär imam wazifaların başqara ul. Bu tantananı oyıştırğan mäxällä räise Diarov çığışınıñ baytaq öleşen Sabircan xäzrätneñ başına töşkän cäberläwlärne tasvirlauğa bağışladı. Toraq yortın tartıp alalar, fatirğa da kertmilär, qullanılmıy torğan munçadan da quıp çığaralar. Mäçet salımın tülär öçen, urmanda buyaw yasarğa yarıy torğan tamırlar cıyıp, şularnı eşkärtep fabrikağa tapşıra. Süze soñında Säyet Diarov ölkä möftie Fatıyx xäzrät Aliullovqa süz birep, bolay dide: “Bezdä Sabircan xäzrätneñ çalması, ul 60 yıl buyı totqan tayaq, 1884-yılda yasalğan mönbär saqlanğan. Xäzer Fatıyx xäzrät şul tayaknı totıp, borınğı mönbärdä wäğäz totar”. Fatıx xäzrättän soñ süz alğan rayon başlığı Vladimir Çubarov awıl xalqınıñ eşçänlegen, täwfiqlı buluın mäçetneñ saqlanıp qaluı belän bäyläde häm rayondağı mäçetlärneñ eşçänlegenä yuğarı bäya birep, yärdämennän taşlamayaçağın belderde. Ul bu bäyrämne oyıştıruğa da yärdäm täqdim itkän, läkin Säyet Diarov mäçetkä tügel – awılğa yärdäm kirägräk digän. Yulsızlıqtan intekkän awılnı olı yul belän totaştıru, awıl eçendä dä asfal't salu – Vladimir Borisoviç xezmäte.

“Azatlıq” radiosı, Ayrat İbrahim, Saqusqay – Sember.

XS
SM
MD
LG