Accessibility links

шимбә, 3 декабрь 2016, Казан вакыты 03:31

“İdel” jurnalınıñ 5 sanı turında Näcibä Safina söyli.


Çirattağı şimbä matbuğat küzätüendä bez sezne “İdel” jurnalınıñ 5 sanı belän tanıştırırbız. “İdel” jurnalı qaysıber sannarın maxsus ber temağa bağışlap bastıra. 5 sanın ul Şayan san dip atasa, bu, 5 sanın alar ber keşene dä bitaraf qaldırmağan fälsäfi töşençä – mäxäbbät temasına bağışlağan. “Mäxäbbät ul üze iske närsä, läkin härber yöräk anı yañarta” digän äytem astında İdel jurnalınıñ bitlärendä urın alğan yazmalar turında sezgä yazuçı, şağirä Näcibä Safina söyli. Räxim itegez. Jurnalnıñ tışlığına töşerelgän ğaşiqlar ayaq astına “Mäxäbbät- qoyaşlı sağış, Mäxäbbät-tatlı ğazap”-digän süzlär tügelgän. Fotorässam Röstäm Möxämmätcanovnıñ bu eşe “İlahi mizgel”dip atalırğa xaqlı. Ä jurnalnı açu belän mäxäbbät där'yasına çumasıñ. Ber sulıştan uqıysıñ da uqıysıñ. Bu yulı “İdelneñ” avtorları:Gabdulla Tuqay, Ğabdraxman Utız İmäni, Ğadel Qutuy, Xäsän Tufan, Sacidä Söläymanova, Fänis Yarullin, Lena Şağircan, Robert Äxmätcan, Rädif Ğataş, Rqail Zäydulla, Zölfät, Rawil Fäyzullin, Raşat Nizami, Nais Ğämbär, Zäki Zäynullin, Tufan Miñnullin,Näbirä Ğıymatdinova, Marsel' Ğäliev, Elmira Şäfiğullina, Firdäwes Ähliä häm tağı da distälärçä jurnalist-xäbärçe, student yäşlär häm ölkän avtorlar. Jurnal üzeneñ bu sanında mäxäbbät beleme turında Ruziä Safiullina äñgämäsendä psixolog, fälsäfäçe, medik fikerlären bäyän itä. Mäxäbbättän iserep , iserek xälenä kergän Taqtaş ta, mäxäbbättän üz –üzen häm söygäne Şihab Äxmärovnıñ bertuğan señlese Zäynäbne dä atıp ütergän qazax şağire Birniäz mäxäbbäte dä häm dönyağa şır ayıq küz belän qarap, millätenä bu nisbättän dä üz süzen citkerergä omtıluçı yazuçı Tufan Miñnullin yazması da bar. Ul “Tatarnıñ äxlaqi kodeksı” nindi bulğan, bulırğa tieşlege xaqında küpqırlı fiker yörtä.(yazmadan özek):“Mäxäbbät! Serle häm tatlı süz. Anıñ ni ikänen äle beräwneñ dä äytep birä alğanı yuq. Çönki ul – yögänsez xis. .... Mäxäbbät utında yanu räxätter dä, ämma ul utnıñ zur yanğınğa äwerelep, yandırıp üterüe dä ixtimal.” Näcibä Safina: Mäxäbbät - cimeşe belän matur, mäğnäle.Ä ul –ğailä qoru, näselne däwam itü digän süz. Ä näsel däwam itü tatarda bik zur qarşılıqlar belän bara.Tufan Miñnullin bu xaqta menä närsä dip yaza: “Başqa millät belän quşılu tatarnıñ çirenä äylände. Monda mäxäbbätneñ qatnaşı bik az, talımsızlıq qına bar. Bigräk tä yegetlärebezne bütän millät qızları bik ciñel “urlıylar”. Kiäwsez qalğan tatar qızları, yalğız qalmas öçen, bik ük telämäsälär dä, bütän millättän ir ezlärgä mäcbür bulalar.(özek tämam).Ä bu tatarnıñ äxlaq kodeksına qarşı ğämäl. Forsattan faydalanıp şundıy şiğerem belän süzemne yomğaqlamaqçı bulam:

Öç törle teoriä bar ber mäxäbbät xaqında,
Söyü ülde, söyü kitte, häm söyü yuq tağın da,
Ülde- digän üterüçe, kitte- digän quuçı,

Yuq- digäne yuğaltuçı, bar- digäne söyüçe
Söyü bulğan, bar, bulaçaq! - aksioma boları,
Söyügä süz tiderälär, citälmägäç, buyları.

Xörmätle radio tıñlawçılar!Çirattağı şimbä matbuğat küzätüe şuşınıñ belän tämam.Bu tapşıruda sez “İdel” jurnalınıñ 5 sanı turında yazuçı, şağirä Näcibä Safinanıñ fikerlären tıñladığız.Tapşırunı alıp bardı Mälikä Basıyr, Qazan.

XS
SM
MD
LG