Accessibility links

якшәмбе, 11 декабрь 2016, Казан вакыты 07:12

Könyaq Osetiäneñ Tbilisidäge xökümät belän qarşılıqları kierenkelänep kitte


Üzäk gruzin xökümäte xakimiaten tanımağan Könyaq Osetiädä soñğı könnärdä kierenkelek arta bara. Andağı osetin köçläre pänceşämbegä qarşı töndä ber gruzin awılına kerep anda urnaştırılğan gruzin ğäskärilären qoralsızlandırğan ide, moña cawap itep Tbilisi qırıs çaralar küräçägen belderä. Ber kön elek gruzin politsiäse Könyaq Osetiädäge Rusiä ğäskäri kärwanın tuqtatqan ide.

Könyaq Osetiäneñ qorallı suğışçıları bügen tönlä Vanati awılına kerep, anda urnaştırılğan gruzin tınıçlıq saqlaw köçlären qoralsızlandırdı häm alarnı totqarlarğa buldı. Ozaq ta ütmäde räsmi Tbilisi, Könyaq Osetiä yağı belän bulğan ikençe ber bäreleştä ike gruzin ğäskärieneñ yaralar aluın xäbär itte. Bolar barısı da Tbilisidäge üzäk xökümätne qırıs belderülär yasawğa, Könyaq Osetiä ğämällärenä tieşle cawap qaytaru belän yanawğa etärde. Vanati awılına yasalğan höcümne, ä anda nigezdä gruzinnar yäşi, Gruziä premyer-ministrı Zurab Jvaniä, "älegä qädär kürelmägän, täkäbber provokatsiä" dip atadı häm totqarlanğan gruzin ğäskärilären azat itü öçen kiçekmästän xälitkeç çaralar küreläçäk dip belderde. Ämma berük waqıtta ul, ike yaq arasındağı şuşı nizaqnıñ tınıç qına çişelergä tieşlegenä dä basım yasadı.

Audio, Zurab Jvaniä

"Bez wäzğiatne kontrol''da totabız dip äytä alabız, häm min bigräk tä xäzer, xislär qaynağan çaqta, şuña basım yasar idem - prezident Saakaşvili häm xökümätebezneñ säyäsäte şul ki, Könyaq Osetiä belän tınıç dialog alıp baru" di Gruziäneñ premyer-ministrı Zurab Jvaniä. İlneñ ikençe ber yuğarı citäkçese, nizaqlarnı xäl itü ministrı Georgi Xaindrava da, Tbilisi moña, yäğni Könyaq Osetiäneñ Vanatidäge gruzin ğäskärilären totqarlawına tieşle cawap birä alsa da, eşne suğışqa citkerergä telämi dip belderde. Ä menä däwlät iminlege şurasın citäklägän Veno Merabaşvili soñğı kierenkelek öçen cawaplılıqnı turıdan-turı Könyaq Osetiä prezidentı Eduard Kokoitygä yökli.

Audio, Veno Merabişvili

"Bezneñ mäğlümatqa qarağanda, Kokoity suğış başlarğa äzer tora, çönki bu anıñ xakimiattä qaluı öçen berdänber mömkinlek bulıp qala" di Veno Merabişvili. Könyaq Osetiä citäkçelege isä Vanati awılındağı xällärne yaqlap, qulğa alınğan gruzinnar ber dä tınıçlıq köçläre tügel, ä sunı butap yatuçılar ğına dip cawap qaytara. Gruziäneñ Rusiä belän çigendä urnaşqan Könyaq Osetiä inde distä yıldan artıq Tbilisidäge üzäk xökümätne tanımıy yäşi, cirle başqala Tsxinvalidäge xakimiat berniçä märtäbä töbäkne Rusiägä quşarğa da tırışıp qaradı. Anda Rusiädän tınıçlıq saqlaw köçläre urnaştırılğan, läkin gruzin yağı alarnı Könyaq Osetiä yağında toruda ğäyepli. Ber kön elek töbäktäge gruzin politsiäse, Rusiä xärbiläreneñ qoral töyägän ber kärwanın tuqtatqan ide, Tbilisi, Mäskäw şulay itep Könyaq Osetiä yağın qoral belän tä''min itep tora dip çıqtı. Läkin Rusiä yağı monı kire qaqtı häm älege qoral, andağı urıs tınıçlıq köçläre öçen cibärelgän ide dip belderde. Könyaq Osetiä prezidentı Kokoitynıñ matbuğat wäkile İrina Gogloeva gruzin politsiäseneñ şuşı ğämälen töbäkkä "qorallı bärep kerü" dip bäyäläde, häm bu suğışqa kiterä ala dip kisätte.

Kärim Kamal
XS
SM
MD
LG