Accessibility links

шимбә, 10 декабрь 2016, Казан вакыты 19:39

Ğiraq wä Süriä urtaq çikne bergäläşep saqlaw turında kileşä


Yaña Ğiraq xökümäteneñ yuğarı wäkile berençe märtäbä kürşedäge Süriägä barıp, ike il arasındağı çiklärne bergäläşep nığıtu xaqında söyläşep qayttı. Ğiraq belän Süriäneñ 600 çaqrım ozınlıqtağı urtaq çige Ğiraqqa ütep kerergä tırışqan törle islamçı radikallar öçen älegä qädär açıq qapqanı xäterlätä ide. Xäzer isä Bagdad, moña çik quyu maqsatında Damask belän urtaq iminlek köçläre buldıraçağın belderä.

Süriä başqalasına Ğiraq premyer-ministrı urınbasarı Barxäm Salix barğan ide, xörmätle tıñlawçılar. Anda ul xätta Süriä prezidentı Bäşär äl-Asäd belän dä oçraştı. Yäkşämbe könne Damaskta üz söyläşüläreneñ näticäläre xaqında söylägändä Salix, Ğiraq häm Süriä islam ğısyançılarınıñ çik aşa irekle ütep yörülären tuqtatu häm şul maqsatta çik buylap urtaq kizülär oyıştıru xaqında kileşte dip belderde.

Audio, Barxäm Sälix

"Süriä yağında şunı añlaw bar, Ğiraqnıñ iminlege häm möstäqillege ber ğiraqlılar öçen genä tügel, ä bar töbäk öçen dä möhim. Menä şul yaqtan qarağanda bez ike yaqnıñ da xezmättäşlek itüe kiräklegen küräbez" dip añlata Ğiraqnıñ Süriä belän çik buyın bergäläşep saqlaw ixtiacın Bagdadtağı yaña xökümätneñ vitse-premyerı Barxäm Sälix. Berük waqıtta ul andıy xezmättäşlekneñ ber Süriä belän genä tügel, ä Ğiraqnıñ başqa kürşeläre belän dä urnaştırıluın teli, bu ilne torğızuğa da, bar töbäktäge iminlekne nığıtuğa da yardäm itäçäk dip belderä.

Audio, Barxäm Sälix

"Bez yaña Ğiraqnıñ töbäktäge illär öçen berektäş buluın, andağı bar xalıqlarğa fayda kiterüen telibez, ä inde Süriä belän mönäsäbätlärgä kilgändä, bezne anıñ belän tarixi da, mädäni dä, ictimaği wä iqtisadi da elemtälär bäyli, bu ikeyaqlı mönäsäbätlärdä ayırım iğtibar taläp itä" di Ğiraq xökümäte başlığınıñ äle genä Damaskta bulıp kitkän urınbasarı. Londonda urnaşqan Xalıqara mönäsäbätlär institutı xezmätkäre Rime Allaf fikerençä, Sälixneñ Süriägä baruı Bagdadtağı xökümätneñ üz kürşeläre tarafınnan tanılunı qazanu omtılışı bulıp tora. Läkin Ğiraqnıñ çik buyı mäs''äläsendä xezmättäşlek kiräklegen tanuı Süriä öçen dä bik möhim, di Allaf.

Audio, Rime Allaf

"Premyer-ministr urınbasarınıñ Süriägä baruı, Süriä telägän närsä bulıp tora - ğiraqlılar Süriä häm başqa kürşe däwlätlär belän xezmättäşlek itü kiräklegen, alay ğına da tügel, Ğiraq wäzğiateneñ bar Yaqın Könçığış öçen möhim buluın tanıy" di Londondağı tikşerenü institutı xezmätkäre Rime Allaf. Räsmi Damask Ğiraqta amerikannar yardäme belän

quyılğan yaña xakimiatne tanırğa cıyınmasa da, başqa ğäräp illäre tösle ük Süriä dä Ğiraqtağı wäzğiatneñ tınıçlanuın teli.

Audio, Rime Allaf

"Süriäme, Söğüd Ğäräbstanımı, älä İordaniäme, Ğiraqnıñ xäzerge küçeş çorı xökümäten tanımağan oçraqta da alar ildäge totrıqsızlıqnıñ däwlät çiklärennän çıqmawı öçen xezmättäşlek itärgä bik riza" di Rime Allaf. Qayber belgeçlär, şul mänfäğät Ğiraqnıñ yaña xakimiaten, ğäräp xökümätläre häm Quşma Ştatlar arasındağı ber aradaşçığa äyländerä ala dip isäpli.

Kärim Kamal
XS
SM
MD
LG