Accessibility links

Кайнар хәбәр

İzge Bilär cirendä «Sälät»neñ 10nçı cıyını tämamlandı


Şuşı cäyläwgä qädär, sälätle yäşlär respublikanıñ 8 rayonında 2 atna buyı maxsuslaşqan lagerlarda yal itte, aralaştı, belem tupladı. «Sälät»neñ 10 yıllığına, bu oyışmanıñ başlanğıçında torğan «Azatlıq» radiosı xäbärçese Ali Ğilmi dä çaqırılğan ide. Ul şuşı 4 köndä Bilärdä buldı häm xäzer «Azatlıq» radiosı tıñlawçılarına bıyılğı cıyınnıñ niçek ütüen, telefonnan ğına, söyläp birde:

«9 iyül könne, Bilär cirenä, 700 läp bala kilep urnaştı. Yubiley cıyını bulğaç, ul 3 kön tügel, 4 kön bardı. Küz aldına kiteregez, Bilär cire, Xucalar tawı, İzge çişmä, şuşında, kiñ alanda, balalar yözlägän çatır qordı, zur tirmälär dä bar ide, äyterseñ lä ber zur şähärçek kilep utırğan. Şimbä könne, alar ğädättäge Saban tuyların ütkärde, alar inde anı Sälät tuy dip atıy, şul uq könne, här alannı täqdim itü tamaşaların kürsätte. Berençe alan 1994 yılda Arçada başlanıp kitkän ide, anda bez kompyuterğa häwäs bulğan ber 10 balanı ğına cıyğan idek, anıñ yünäleşe - fänni ide. Xäzer «Sälät»tä nindi genä yünäleştä eşlämi, tarix diseñme, ädäbiät-sänğätme - teläsä qaysısı bar. Şuşı 10nçı cıyınğa, tege waqıtnı 1994 yılda, berençe «Sälät» alanında qatnaşqan yegetlär kilde, Samardan - Yösıf, Voljskiydan – Röstäm, Älmättän – Nail. Alar inde xäzer zur şirkätlär citäkli, läkin «Sälät»ne onıtmıy. Berençe sälkeşlär belän bik cılı oçraşu buldı. Yäkşämbe könne yäşlär qatnaşlığında fänni konferensiä buldı. Kiläçäktä Bilärdä «FänSar» Yäşlärneñ fän şähärçegen oyıştıru küz aldında totıla. Menä şuşı berläşmäne alar niçek kürergä telilär, şul xaqta här 8 alan çığış yasap, üz täqdimnären kertte. Min alarnı tıñlap qaradım da, xäyran qaldım. Nindi genä täqdimnär yuq alarda. Bilärneñ tabiğäten saqlaw, tarixnı öyränü, arxeologik tikşerenülär ütkärü, zamança texnologiälärne üsterü mäs’äläläre dä kütärelde. Düşämbe könne, yäşlär yanına ministr Marat Barıyıv kilep kitte, ğalimnär Änwär Xäyri häm Fayaz Xucin Bilär qazılmalarına qarap däres ütkärde, Fännär Akademiäsennän zur wäkilçelek kilgän ide. 13 iyüldä yäşlär çatırların sütep, kiläse yılğa da Bilärgä kilergä yazsın dip, taralıştılar.»

Sez, xäbärçebez Ali Ğilmineñ Bilärdäge waqiğalar xaqındağı xäbären işettegez. Ul şulay uq, fänne üsterü, telne, tarixnı niçek itep saqlaw turındağı yäşlär fikeren yazıp alğan häm alarnı tıñlawıçlarıbızğa «Azatlıq» radiosınıñ tapşırularında işetterergä wäğdä itte.

Bikä Timerova.

XS
SM
MD
LG