Accessibility links

сишәмбе, 6 декабрь 2016, Казан вакыты 18:55

Dönyanıñ iñ yabıq illäre rätendä torğan Törkmänstan üzendä "Mayaq" radiosı tapşıruların tuqtatırğa buldı


Törkmänstannıñ tışqı dönyadan ayırıluı däwam itä, uzğan yäkşämbedä anda Mäskäwdän söylägän "Mayaq" radiosı programmaların tapşıru tuqtatıldı. Törkmän yağı monı fäqät texnik säbäplär arqasında ğına eşläwen äytsä dä, Rusiä Aşğabadtan räsmi añlatma taläp itä. Üzlärendä iärçen antennası bulmağan törkmännär xäzer çit il mäğlümat çaralarınnan tulısınça diärlek özelgän xäldä qaldı.

Audio, Mayaq sign-on

"Mayaq" radiosınıñ şuşı awazı Sovetlar Berlegendä yäşägän härkemgä diärlek tanış, xörmätle tıñlawçılar. Äle 1964-nçe yılda uq täwlek buyı söyli başlağan şuşı radio yañalıqlarnı muzıka belän qatnaştırıp ilneñ här poçmağına citkerep tordı. Bu xäl öleşçä bügenge köndä dä saqlanıp kilä. Sovetlar Berlege inde küptän tarqalsa da, "Mayaq" üz tıñlawçıların saqlap qala aldı. Moña qädär anı Törkmänstanda da yaratıp tıñlıylar ide, läkin uzğan yäkşämbedä Aşğabad bernindi kisätülärsez üzendä "Mayaq" tapşıruların tuqtatırğa buldı. Tapşırularnıñ populärlegen tikşerü anda ütkärelmäsä dä, radionıñ citäkçese Andrey Bıstritski Mäskäwdän bu xaqta bolay dip belderde:

Audio, Andrey Bıstritski

"İnterfax agentlığı "Mayaq"nıñ Törkmänstanda iñ populär radio buluı xaqında xäbär itkän ide, läkin añlıysızdır, anda tıñlawçılar sanın tikşerep bulmıy, şuña kürä tögäl sannar kiterü mömkin tügel. Ara-tirä ütkärelgän tikşerülär 40 protsent xalıqnıñ "Mayaq"nı belüen kürsätä, läkin alar bezne ni däräcädä yış häm ni däräcädä daimi tıñlıydır, monısın bez tögäl äytä almıybız" di "Mayaq" radiosınıñ Törkmänstandağı populärlege turında anıñ citäkçese Bıstritski. Niçek kenä bulmasın, bu xaqta inde xäzer ütkän zaman da ğına söyläp bula. Törkmän yağı üzeneñ "Mayaq" tapşıruların tuqtatu turındağı qararın texnik säbäplär belän genä añlattı. İlneñ elemtä ministrlığı belderüenä qarağanda, anda "Mayaq" programmaların tapşıru cihazları saftan çıqqan. Alarnı yañadan tözätü öçen 120 meñ dollar aqça häm, iñ möhime, ber yıldan artıq waqıt kiräk bulaçaq ikän. Ämma Bıstritski, ägär dä tapşırularnı tuqtatıp toru fäqät texnik säbäplär belän genä añlatılsa, alar barğan yışlıqlar şunda uq, xalıq cırların ğına uynatqan törkmän stansiälärenä birelmägän bulır ide di. "Mayaq" radiosı yışlıqlarında xäzer çınnan da milli köylär genä yañğırıy dip xäbär itelä. Rusiäneñ Aşğabadtağı ilçelege dä törkmän yağı ğämälenä şiklänep qarıy häm xakimiatneñ moña räsmän añlatma birüen teli. Süz biredä Törkmänstanda yäşägän 300 meñläp urıs häm urıstelle xalıqnı Rusiä radiosı tapşırularınnan mäxrüm itü turında ğına barmıy, ildäge bar 5 million keşe xäzer çit il mäğlümat çaralarınnan tulısınça diärlek ayırılğan xäldä qaldı. Törkmänstandağı räsmi mäğlümattan tış nindi dä bulsa irekle xäbärne işetü yäisä kürü mömkinlegenä xäzer barı tik iärçen antennaları yäisä qısqa dulqınlı radioları bulğannar ğına iä. Äle 1998-nçe yılda uq Törkmänstan xakimiate ildä Ostankino telekanalı tapşıruların kürsätüne tuqtatqan ide, 2002-nçe yılda ul üz watandaşlarına häm Törkmänstanda yäşäwçelärgä çit il matbuğatına yazılunı tıydı. Şulay itep, "Mayaq" radiosı uzğan yäkşämbegä qädär, törkmännärne, tulısınça bulmasa da, azmı-küpme bäysez, irekle mäğlümat belän tä''min itep torğan berdänber mäğlümat çığanağı ide. Anıñ yışlıqlarında xäzer fäqät xalıq köyläre häm törkmänbaşı Saparmorad Niazovnıñ aqıllı säyäsäte wä güzäl qazanışları turındağı xäbärlär genä yañğırıy.

Kärim Kamal
XS
SM
MD
LG