Gäzitlärdä törle cinayätlär turında yazmalar işäya bara. Ölkäneñ Çardaqlı rayonında Eçke eşlär idaräse beryulı 4 urında xoquq saqlaw buyınça kiñäşmälär uzdırdı. İdarä başlığı general Luqin üze Awıl xucalığı akademiäse urnaşqan Uçxoz qasabasındağı kiñäşmäne alıp bardı. General, akademiä rektorı ğozere buyınça, biredä militsiä sağın köçäytergä kürsätmä birde. Läkin monıñ belän genä tärtip urnaştıruğa ömetlänü qıyın, çönki yäş buınnıñ äxlaqi xaläte tübän. Ä här kemgä berär militsioner bäyläp quyıp bulmıy inde. Militsiä xezmätkärläreneñ üz äxlağı da aqsaw oçraqları bulğanda – bigräk tä.
Mäsäläneñ tamırı – mäktäp sistemasınıñ cinayätçel urıslaştıru säyäsätendä. Ğomer baqıyınnan birle bala ğailä, äbi-babay tä'sire astında tärbiälängän. Bu izge wazifa “detsad” dip atalğan “saqlıq kamerasına” tapşırıldı. Töp wazifası itep tamırsız, dinsez, telsez urıs patriotı yasawnı quyğan mäktäp sisteması äxlaqsız düñgäläk qawemen ürçette. Äle şundıy “belem häm tärbiäse” öçen tırışıp-tırışıp ata-analardan aqça suıra. Lenin babay uqığan 1-gimnaziä citäkçelege östennän prokuraturağa häm Mäğärif idaräsenä şiqayät cibärelgän. Täräzä pärdäläre, televizor alu häm başqa şundıy ixtıäclar öçen här berençe sıynıfqa kerüçe bala öçen 5әр meñ rubl' aqça taläp itälär ikän.
Bu gimnaziä Böek Leninnı da bik ük döres tärbiälämägän küräseñ: yaratmağan ul tuğan bişegen. Ber riwayät şundıy fikergä nigez birä sıman. 1918-yılda Sovet Xökümäte başlığı Ul'yanov-Leninğa anıñ watanı Semberdä qotoçqıç cir şuışuı turında xäbär itälär. İl'iç isä: “pusqay spolzaet, parşiwıy bıl gorodişko”, digän imeş. Monısı xaqmı-naxaqmı – äytüe qıyın. Ä menä xaq: şul gimnaziäne tämamlap, Qazanğa uqırğa kitkännän soñ, Volodya Ul'yanov berwaqıtta da üzeneñ isemen yörtäçäk şähärgä ayak basmağan.
Ayrat İbarhim, Sember
Ayrat İbarhim, Sember
