Accessibility links

шимбә, 10 декабрь 2016, Казан вакыты 09:58

Tatar qızları da SuperModel bulırğa teli


Tatar qızları çibärlekläre belän elek-elektän dan totqan. Zamança şartlarda çibär qızlarğa üzlären moda dönyasında kürsätergä mömkinleklär zur. 14 iyül könne Qazanda «Sin - SuperModel» isemle televidenie tamaşasın oyıştıruçılar berniçä distä Tatarstan qızın saylap aldı. Ğomumrusiä bäygesendä ciñüçene – 250 meñ dollarlıq kontrakt häm xalıqara çibär qızlar bäygesendä qatnaşu xoquqı kötä. Matbuğat oçraşuında äytkänçä, «Sin -SuperModel-2» tamaşasın oyıştıruçılar, qızlarğa çibärlek yağınnan ğına bäyä birmi, alarnıñ ni däräcädä qızılı şäxes bulğanın açıqlarğa tırışa. Modellär dönyasında maturlıq bilgeläre üzgärep bara, mäsälän xäzer, sarı başlı, zäñgär küzle, ozın ayaqlı ğına bulu citmi, yözneñ üzençälekkä iä buluı, qıznıñ söykemle söyäge buluı möhim ikän. Şulay uq, Mäskäw qunaqları äytkänçä, alar nindider millätneñ sıyfatların açıq çağıldırğan yözlärne kürergä telärlär ide. Qazandağı saylap alu turına 100 genä yaqın qız kilde. Ällä könneñ bik esse buluı qomaçaw itkänder, ällä qaysıları belmi qalğandır – bezgä bilgesez. Şuşı 100 läp ozın ayaqlı, 16-18 yäşlek qız arasında Tatarstannıñ rayonnarın, şähärlärennän, kürşe Çuaşstannan çibärkäylär dä bar ide. Mäskäwdän kilgän jyuri äğzäläre alarnıñ buy-sınnarın qaradı. Böten qızlarğa da ber uq soraw birelde: SuperModel bulır öçen sin närsä eşlärgä äzer? Qızlarnıñ küpçelege:mawıqtırğıç tormış belän yäşär öçen, teläsä närsägä barırğa äzer, dip cawap birde. Jyuri härber qızğa centekle bäyä birgändä, bülmäneñ tışında, basqıçta, qalğan qızlar, ozaq waqıt ayaq östendä basıp torıp, dulqınlanıp çiratın kötte. Qaysıberläre belän söyläşep aldıq, aralarında tatar qızları bulsa da, berse dä tatarça belmi bulıp çıqtı. Bäygedä qatnaşuçılar äytkänçä, alarnıñ model bulırğa, säyäxät itärgä, matur, bay tormış belän yäşärgä teläkläre zur, şunıñ öçen alar awırlıqlar belän köräşergä äzer. Bu bäygeneñ saylap alu öleşe genä ide äle, alda qızlarnı tağı da qatıraq sınawlar kötä. Çın tatar yözle qızlar bäygedä nindi bulsa ürlärgä ireşä alırmı, yuqmı – anı közen genä belerbez.

Bikä Timerova.

XS
SM
MD
LG