Accessibility links

якшәмбе, 11 декабрь 2016, Казан вакыты 10:58

Qazan serlären aça


14 yül könne Qazanda 2004 yılğı respublika byudjetınıñ ütäleşen tikşerdelär. Uzğan yartıyıllıq näticälärenä qarağanda, anıñ kerem öleşe 110 protsentqa, ä çığım öleşe – 98 protsentqa ütälgän. Byudjetqa cıyılğan 40 milliard sum aqçadan 21 milliardı respublikada qalıp, 19 milliardı federal üzäkkä ozatılğan, dip xäbär itä İntertat.ru gäcite. Törkiäneñ Din eşläre idäräse citäkçese urınbasarı Mäxmät Görmäz Tatarstannıñ Diniä näzarätenä büläklär tapşırdı. Respublika möftie Ğosman xäzrät İsxaqiğa Törkiäneñ Tatarstandağı wäkile İsmail Xaqqı Mussa qatnaşlığında tantanalı räweştä 21 kompyuter häm ber VAZ avtomobile tapşırıldı. Älege büläklär respublikanıñ dini uqu yortlarına taratılaçaq.

Bu könnärdä Tatarstanda bilgele rus şağire Gavriil Derjavinğa bağışlanğan uqular başlanıp kitte. Alar şağirneñ tuuına 161 yıl tulu uñayınnan anıñ tuğan cirendä – respublikanıñ Layış rayonında uza. Bıyıl Derjavin uquları inde ikençe märtäbä ütä häm ul şağirneñ icatı, tormış yulına ğına tügel, ä Qazannıñ şul waqıttağı tarixına da bağışlana. Başqalanıñ tiränräk tarixı da açıqlana bara. Qazan kremle yanında bara torğan qazılmalarda şuşı könnärdä genä tağın ber qızıqlı tabıldıqqa tap bulğannar. Bu yulı arxeologlar Aq bars räseme töşkän bilbawğa quya torğan kömeş pryajka tapqannar. Mondıy barslı äyberlär elek tä bulğan anısı, läkin soñğı tabıldıqnıñ üzençälege şunda – andağı räsem Tatarstannıñ xäzerge gerbındağı Aq barsnı xäterlätä ikän.

Gölnaz İlgizär

XS
SM
MD
LG