Accessibility links

сишәмбе, 6 декабрь 2016, Казан вакыты 13:14

Tatar balaları rus balalarınnan ayırılamı?


Qazanda tağın ber üzäk kanalnıñ korrespondent punktı oyıştırıldı. Xäyer, respublikada üzebezneñ mäğlümät çaraları da citärlek. Yış qına alar söylägän, kürsätkän äyberlär dä tañ qaldırırlıq. Mäsälän, sişämbe kiçen Qazannıñ ber xosusıy telekompaniäseneñ yañalıqlar programmasında respublika Mäğärif ministrlığı çığarğan metodik äsbap turında süz bardı. Anda rus häm tatar balalarınıñ buy, sın kebek fizik üzençälekläre häm alar näticälärendä bilgelängän balalarnıñ fizik äzerleklege standartları urın alğan. Jurnalist fikerençä, bu rasistik ruxta eşlängän äsbap. Şunı isbatlaw öçen xätta Adol’f Gitlernıñ Mein Kampf kitabınnan rasa çistalığı xaqında sitatalar kiterelep, süzlärgä kileşle videotasmalar da kürsätelde. Gitlerdan soñ ekranda Mäğärif ministrı Fariz Xarisov añlatmalar birde. Tatarstan pedagogları tatar häm rus balaların niçek alay bülgännär soñ? Ministrlıqtan alğan mäğlümätlärgä qarağanda, älege äsbapnı çığaruçılar Tatarstannıñ Sälämätlek saqlaw ministrlığı ütkärgän tikşerenülär näticälärenä nigezlängännär. Älege näticälär törle millät balalarınıñ antropometrik kürsätkeçläreneñ ber-bersennän ayırılıp toruın isbatlıy. Şularğa nigezlänep, fizik äzerlek standartları da törle kilep çığa. Tabiplar ütkärgän tikşerü şulay uq älege antropometrik kürsätkeçlärneñ yıldan-yıl tigezläşä baruın da kürsätä ikän. Şulay itep, metodik äsbapta kiterelgän kürsätkeçlär tatarstan pedagoglarınıñ rasist buluın tügel, a bar tik törle millät balaları arasında ayırmalar barlığın, läkin alarnıñ yıldan-yıl kimi baruın ğına kürsäter öçen birelgän, dip belderde bezgä Mäğärif ministrlığınıñ matbuğat üzäge citäkçese.

Gölnaz İlgizär

XS
SM
MD
LG