Accessibility links

җомга, 9 декабрь 2016, Казан вакыты 07:06

Tatarstan başqalasında Qazan İzge ana ikonasın quyırğa urın äzerlilär


Küptän tügel, Vatikan wäkile, Rim Papası Qazan izge ana ikonasın Rusiägä qaytartırğa äzer, digän belderü yasadı. Bu waqiğanıñ tögäl köne dä ataldı. İkona Pravoslavie dineneñ Uspenie bäyrämendä, 28 avgustta qaytırğa tieş. 15 iyül könne Qazan şähär başlığı Kamil İsxaqov matbuğat oçraşuın ütkärep, bu waqiğa tiräsendäge wazğiätkä añlatma birde.

Qazan şähär başlığı Kamil İsxaqov, ikonanıñ Qazanğa qaytarıluın teli. Läkin älegä anı Rusiägä, yäğni Mäskäwgä qaytıp urnaşuı turında ğına süz bara. Kamil İsxaqov xıyallarğa birelep, bälkem Rusiä Pravoslav çirkäwe başlığı Aleksey II anı Qazanğa alıp qaytıp tapşırır, dip söyläde. Bu faraz ğına bulsa da, Kamil İsxaqov fikerçä, ömetlänergä urın bar, çönki Aleksiy IIneñ, ikona tabılğan urında bulırğa tieş, dip äytkäne bulğan. Läkin Rusiä Pravoslav çirkäwe äle tögäl qararğa kilmägän ikän. Alay da Qazan şähär başlığı äytkänçä, Tatarstan başqalasında ikonanı qabul itü öçen äzerlek çaraları kürelä. Tatarstan Pravoslav çirkäwe Başlığı Anastasiy ataqay häm Kamil İsxaqov ta, andıy qäderle ikona daimi räweştä uqular bara torğan xram, çirkäwgä quyılırğa tieş, digän fikerdä tora. Ul Blagoveşenie, yäki Petr-Pawel çirkäwleläre bulırğa mömkin. Älegä Qazan şähär citäkçelege, şuşı borınğı ikonanı tieşle şartlarda saqlar öçen maxsus muzey cihazın satıp alırğa äzerlänä, dide Kamil İsxaqov. Anıñ süzlärençä, Rusiäneñ pravoslav cämäğätçelege Qazan izge ana ikonasınıñ qaytartıluın tüzemsezlek belän kötä. Şähär başlığı süzlärençä, möfti Ğosman xäzrät İsxaqi da, ikonanıñ qaytuına şatlıqlı xislär beldergän ikän. Şähär xakimiätläreneñ, Qazan izge ana ikonasın tabılu urını, Tämäke fabrikası cirlegendäge çirkäwne torğızırğa niätläre bulsa da, xäzer citäkçelär kire uylağan, çönki bu eş bik qıybatqa töşärgä mömkin. Süz 5-8 million dollar turında bara.

İkona qaytarılğan oçraqta, Qazan - pravoslav dinen totuçılarnıñ Mäkkäsenä, ziärät qılu urınına äyläner, dip ömetlänä şähär başlığı.

Bikä Timerova.

XS
SM
MD
LG