Accessibility links

дүшәмбе, 5 декабрь 2016, Казан вакыты 17:42

Törkmänstanda xakimiatne bärep töşerügä öndägän uram qäğäzläre taratıla


Törkmänstan başqalası Aşğabadtan kötelmägän xäbär kilde, xörmätle tıñlawçılar. Andağı bazarlarda ilneñ xökümäten bärep töşerügä öndägän uram qäğäzläre tabılğan. Alarnı kem yazğan häm kem taratqan, bilgele tügel, läkin niçek kenä bulmasın, cämğiat xökümät tarafınnan tulısınça kontrol'' itelgän il öçen bu ğädättän tış häm citdi ğämäl bulıp tora.

Törkmänstan xakimiatenä qarşı yazılğan uram qäğäzläre başqala bazarlarında äle uzğan atnada uq kürensä dä, bu turıda xäbärlär, dönyanıñ iñ yabıq illärennän bersenä äylängän Törkmänstannan xäzer genä kilä başladı. İlneñ politsiäse häm iminlek xezmätläre Saparmorad Niazov xökümäten bärep töşerügä öndäwçelärne ezläwen äle dä däwam itä dip belderelä. İrekle fiker belderü mömkin bulmağan häm här şundıy oçraq xakimiat tarafınnan şunda uq bastırılğan Törkmänstanda xakimiatkä qarşı öndämälär belän çığu bik siräk, andıy oçraqlar ğädättä, qänäğätsezlek belderüçelärneñ yä törmägä yabıluı, yä ildän çitkä sörelüenä kiterä. Şähär bazarında xakimiatkä qarşı yazılğan uram qäğäzläre kürüen radiobızğa Aşğabadta yäşäwçe ber keşe dä rasladı, läkin ul üz isemen äytergä qurıqtı häm ğomumän, bu xaqta söyläwneñ genä dä üze öçen qurqınıç buluına işarä itte.

Audio

"Andıy närsä buldı, läkin keşelär bu xaqta söylärgä qurqa, alardan, "sez anda buldığızmı? üzegez kürdegezme?" dip sorağaç ta, ul turıda söylämäw xäyerleräk dip belderä. Küplär şürli, xosisi söyläşülärdä dä moña qağılmasqa tırışa häm belgännäre xaqında açıqtan-açıq äytä almıy" di şuşı Aşğabad keşese. Taratılğan uram qäğäzlärendä, törkmännär irekle xalıq bulıp tuğan, alar ğorur millät häm zalim xakimiattän qotıluğa layıqlı dip yazılğan bulğan. Anda şulay uq, kiläse buınnar öçen cawaplılıqnı üz qulıbızğa alu, prezident Niazovnı bärep töşerü häm anı mäxkämägä tapşıru waqıtı citte dip tä äytelä. Möselmannarğa qarata ayırım öndämä dä yasala - alarnı Niazovnıñ Aşğabad yanındağı tuğan şähärçegendä tözelep yatqan mäçetkä namazğa yörmäskä öndilär. Şuşı mäçet Üzäk Aziädä iñ zurısı bulaçaq dip farazlana. Tik küp kenä möselmannar fikerençä, aña yörü gönah bulaçaq, çönki Niazov mäçet diwarlarına yazılaçaq özemtälärne Qör''ännän genä tügel, ä üzeneñ "Ruxnamä" äsärennän dä alu färmanın birgän. Törkmänstan xakimiatenä qarşı öndämälär taratılu oçraqların oppozitsiäneñ sörgendä yäşägän wäkile Nurmöxämmäd Hanamov ta raslıy, ul bu xaqta üz çığanaqlarınnan mäğlümat alğan.

Audio, Nurmöxämmäd Hanamov

"Bu xäbär döres. Häm alar öndämälärne uzğan atnakiç häm yäkşämbe arasında ğına taratmadı, bez bu xaqta elegräk tä işetkän idek häm monıñ planlaştırılğanın belgän idek. Bu inde ike yıl däwamında bara" dip belderä cittäge törkmän oppozitsiäse wäkile Nurmöxämmäd Hanamov. Anıñ, Niazov xakimiatenä qarşı öndämälär taratu inde berniçä yıl bara digän süzläre Törkmänstannı küptän tügel genä taşlap kitüçelär tarafınnan da raslana. Läkin elek andıy qäğäzlär ğädättä tön urtasında poçta tartmalarında qaldırılğan bulsa, xäzer alarnıñ başqala bazarlarda kürenä başlawı, Törkmänstandağı qänäğätsezlekneñ yaña däräcägä çığa aluın kürsätä.

Kärim Kamal
XS
SM
MD
LG