Accessibility links

чәршәмбе, 7 декабрь 2016, Казан вакыты 13:45

YUKOS eşe: Xodorkovski, xakimiatneñ köç belän uynawı Rusiä kiläçäge öçen qurınıç tudıra dip kisätä


Comğa könne Mäskäwneñ Meşçan mäxkämäsendä Mixail Xodorkovski häm Platon Lebedev eşen qaraw däwam itte. Bıltır qulğa alınğannan soñ berençe märtäbä alar ikese dä ğäyepläwlärgä qarata üz qaraşların bäyän itä aldı. Aña qädär isä eşne alıp barğan prokuror, Xodorkovski häm Lebedevne berniçä cinayät qıluda ğäyepläp çığış yasadı.

Xodorkovski/Platonov eşen küzätep baruçılar alarnı moña qädär ara-tirä mäxkämä zalında ğına kürä ide, xäzer isä şuşı ike mäğlüm eşmäkär, üzlärenä qarşı alıp barılğan cinayät eşe turında üz fikerlären belderä aldı. Comğa könne Mäskäwneñ Meşçan mäxkämäsendä prokuror çığışı tämamlandı häm süz ğäyeplängän yaqqa birelde. Süzne berençe bulıp Platon Lebedev aldı häm baştan uq, üzeneñ ğäyepsez buluı xaqında belderde. Şuşı çığışın ul, prokuratura häm mäxkämäneñ bu eşne alıp barğanda, Rusiä Konstitutsiäsen häm cinayät kodeksın, andağı ayırım matdälärne niçek bozuın kürsätkän dälillär belän sürätläde. Anıñ süzlärenä qarağanda, ber genä ğäyepläw dä çınbarlıqqa turı kilmi, häm şul säbäple ul, xakimiat anı säyäsi yäisä başqa şundıy säbäplär arqasında ezärlekli dip uylıy. Näq şuña uq ikençe ğäyeplänüçe, Lebedevneñ xezmättäşe, Rusiäneñ iñ bay keşese sanalğan Mixail Xodorkovski dä işarä itä. Döres, ul üzen ezärlekläwne turıdan-turı säyäsi säbäplär belän añlatudan totılıp qaldı. YUKOSneñ elekke başlığı, "min kemneñder, Xodorkovski cinayät qıluda ğäyepläwlärdän qupşı säyäsi belderülär belän qaplanırğa tırışa dip äytüen telämim" dide. Anıñ süzlärençä, YUKOS häm Xodorkovski eşeneñ asılda ni buluı, monıñ säyäsi maqsatlardan çığıp alıp barıluı yäisä ğädäti ber cinayät eşe genä bulu-bulmawı xaqında bäxäslär soñğı ber yıl eçendä ildä şaqtıy bardı. Şul waqıt eçendä cämğiatneñ zur öleşe üz qaraşın buldırdı, ä inde, ere şirkät çitäkçesen, ğomumän teläsä nindi bay keşene ğäyepläw aldan uq xaqlı dip uylawçılarnıñ fikeren berniçek tä üzgärtep bulmas dip belderde mäxkämädä Mixail Xodorkovski. Üzen prokuratura tarafınnan berniçä cinayät qıluda ğäyepläwlärne ul axmaq häm dälilsez dip atadı. Alay ğına da tügel, üz eşeneñ säyäsi maqsatlardan çığıp başlanuın açıqtan-açıq äytmäsä dä Mixail Xodorkovski säyäsi belderü yasawdan totılıp qala almadı, häm "bar tärtipne saqlağan bulıp, ämma qanunğa bitaraflıq kürsätep köç belän uynaw, ilneñ täräqqiate öçen bik qurqınıç bula ala" dip belderde. Anıñ çığışı mäxkämä utırışında qatnaşqan prokuratura wäkile Şoxinğa da tä''sir itkän bulsa kiräk, ul "min çın küñeldän Xodorkovski häm Lebedevneñ cinayät qıluğa qatnaşı bulmaw turındağı süzlärenä ışanırğa telär idem" dide, läkin şunda uq, "tik menä tuplanğan dälillär kiresen söyli şul" dip belderde. Üzläreneñ ğäyepsez buluın Mixail Xodorkovski häm Platon Lebedev mäxkämäneñ aldağı utırışlarında isbatlarğa cıyına, bu xaqta alarnıñ advokatı Genrix Padva da belderä.

Audio, Genrix Padva

"Alar ikese dä bäyän itelgän ğäyepläwlär belän kileşmi, alarnıñ qarşılıqlı buluı häm çınbarlıqqa turı kilmäwe turında äytä häm mäxkämä barışında üzläreneñ ğäyepsez buluın isbatlarğa tırışaçağın belderä" di Xodorkovski häm Lebedevne yaqlawçı Genrix Padva. Mäxkämä üz utırışların här atnada dürtär kön alıp barırğa cıyına, çärşämbelärdä tänäfes bulaçaq. Meşçan mäxkämäseneñ Xodorkovski/Lebedev eşen qarağan çirattağı utırışı 20-nçe yülgä bilgelände.

Kärim Kamal
XS
SM
MD
LG