Accessibility links

шимбә, 10 декабрь 2016, Казан вакыты 11:56

Tatarstannıñ yuğarı uqu yortları yabılırmı?


Uqu yortlarına qabul itü imtixannarı berwaqıtta da kürmägän, işetmägänçä kierenke. Şimbä könne qazan universitetınıñ Tatar jurnalistika bülegendä berençe imtixan - icadi konkurs häm äñgämä ütkärelde. Bıyıl universitetnıñ tatar jurnalistikası bülegenä 15 keşe qabul itelergä tieş. Ğariza birüçelär 70тән artıq, şul isäptän - 27 medal' alğan uquçılar.

İmtixan aluçılar, fakul'tet, institut citäkçeläre öçen dä bu könnär bik kierenke. Rusiädä yuğarı uqu yortları soñğı arada könnän-kön arta bardı. Tatarstanda da xäl şulayraq. Mäsälän, äle 1998 yılda respublikada 23 yuğarı uqu yortı bulsa, 2004 yılğa alarnıñ sanı 80nän dä artıp kitte. Bolar barısı da möstäqil uqu yortları ğına tügel inde älbättä, şuşı 80 arasında törle institut, universitetlarnıñ filialları da bar. Läkin, qızğanıçqa qarşı, san artu uqıtunıñ sıyfatı artuğa kitermäde. Mondıy wazğiät Rusiäneñ Fän häm mäğärif ministrlığınıñ da borçuın tudıra başladı kebek. Şuşı arada ğına bilgele bulğança, qayber uqu yortlarınıñ akkreditatsiäse belän problemaları kilep tuğan. Fän häm mäğärif ölkäsendä kontrol’ itü buyınça federal’ xezmäteneñ qara isemlegendä Rusiäneñ törle töbägendäge 18 uqu yortı isäplänä. Alarnıñ qaysıları attestatsiä ütmägän, qayberäwläre tege yäki bu belgeçlärne äzerläw xoquqların yuğaltqan.

Älege isemlektä Tatarstannıñ VUZları yuq. Läkin menä Qazanda filialı bulğan Rusiä däwlät säwdä-iqtisadi universitetı, elekkege Mäskäw kommersiä institutı, isemlekkä kertelgän 18 yuğarı uqu yortları sanında bar. Universitetnıñ häm anıñ filiallarınıñ, şul isäptän, Qazandağı da, akkreditatsiäse kiçekterelgän. Bügenge köndä institutta abiturientlardan ğarizalar qabul itü tämamlanğan häm anda kerü imtixannarı bara. Bıyıl Rusiä däwlät säwdä-iqtisadi universitetınıñ Qazan filialına 10 keşe qabul iteläçäk. Barısı anda buxgalter xisabı, audit, medejment, şirkätlärdä idärä itü iqtisatı, kommersiä, xalıqara iqtisat belgeçleklärendä 1200 student belem ala. Uqu yortınıñ akkreditatsiäse belän problemaları xaqındağı mäğlümätne tikşerer öçen bez Rusiä däwlät säwdä-iqtisadi universitetınıñ Qazan filialına möräcäğät ittek. İnstitutnıñ rektorı Professor Rif Aqbaşov süzlärençä, älege institut 2007 yılğa qädär attestatsiälängän. Qazan filialınıñ akkreditatsiä isä, Mäskäwdäge töp universitetnıqı belän bergä ütä häm ul uzıp baruçı yılnıñ sentäberendä genä bulırğa tieş. Bernindi dä problema yuq, bez qanuni nigezdä üzebezneñ eşçänlekne alıp barabız, dide rektor. Läkin şuşı häm başqa yuğarı uqu yortlarınıñ problemaları xaqında mäğlümätneñ näq menä imtixannar birü waqıtına turı kilüe uqırğa kerüçelärneñ häm uqu yortlarınıñ citäkçelegeneñ borçuın ayıruça arttırdı.

Älegä Fän häm mäğärif ölkäsendä kontrol’ itü buyınça federal’ xezmät tarafınnan tözelgän yuğarı uqu yortlarınıñ qara isemlegendä kübräk filiallar ğına. Bu berençe çiratta alarnıñ bik küp buluı belän añlatıla. Läkin, belgeçlär fikerençä, yuğarı uqu yortlarına qarata taläplär qatğıylanaçaq. Bügen dönya kürgän isemlek küpläp ürçegän uqu yortlarına qarşı başlanğan köräşneñ başı ğına. Bu köräşneñ qorbannarı arasında Tatarstannıñ yuğarı uqu yortları bulırmı? Bu sorawğa cawapnı kiläçäk kürsäter.

Ä älegä respublika abiturientlarnıñ iñ kümäkläp kilgän uqu yortı - Qazan däwlät universitetı. Düşämbe könne Tatmedia agentlığında anıñ rektorı Mäğsüm Säläxov universitetnıñ 200 yıllıq yubileyın ütkärü turında matbuğat oçraşuı uzdırdı. Oktäber, noyäber aylarında ütäçäk ike ğasırlıq yubiley Qazannıñ meñyıllığına ber repetitsiä kebek zur waqiğa bulaçaq.

Gölnaz İlgizär

XS
SM
MD
LG