Accessibility links

шимбә, 10 декабрь 2016, Казан вакыты 19:44

Sıra eçkängä irlek äğzaları zuraymıy. “Qızıl Şärıq” reklaması yalğan bulıp çıqtı.


Härkem üzençä mögez çığara. Menä berniçä ay inde televidenie kanallarında “Bädräf” dip atalğan reklama roligı kürsätelä. Läkin ul bädräf turında tügel. Ä “Qızıl şärıq” sırasın eçüneñ sawabı, döresräge, faydası turında. İmeşter, 0.5 litrlı şeşädän sıra eçügä qarağanda, 0.6 litrlı şeşädän eçkän ir-atlarnıñ “То, что надо” digän äğzaları 20% zurraq bula. Äxlaq yağınnan da, sälämätlek yağınnan da, matur närsä tügel. Eçemlekne bädräf aşa maqtaw şikleräk. Döres, sıranıñ yulı qısqa häm bik tiz bädräfkä alıp kilä. Şulay da, monopoliägä qarşı federal' xezmäteneñ Tatarstan buyınça idäräse şuşı bädräf-sıra reklamasına bilgelämä çığarğan. Yäğni, bu rolik kürsätüdän alınırğa mömkin. “Azatlıq” xäbärçese monopoliägä qarşı xezmätneñ Tatarstan idäräse citäkçese Aleksandr Lozovoy, şul uq oyışmanıñ belgeçe Lyubov' Cabbarova älege faktnıñ döreslekkä turı kilüen rasladılar. Lyubov' Cabbarova äytüençä, äxlaq normaların ülçäw häm bilgeläw çeterekle bulğanlıqtan, bu yulı antimonopol'şçiklar bik qızıqlı ısul tapqannar. Reklamada äytelgän mäğlümat döreslekkä turı kiläme? Sälämätlek saqlaw ministrlığı häm başqa belgeçlär belän sorawnı öyrängännän soñ, sıra eçü irlärneñ äğzaların yäki xatın-qızlarnıñ kükräklären zuraytmıy ikän. Äytelgän süz tögäl häm döres bulırğa tieş. “Qızıl Şärıq”nıñ şuşı reklaması yazmışı sişämbe könne monopoliägä qarşı xezmät idäräsendäge komissiä utırışında xäl iteläçäk. Xäzergä zakazçılar bu reklamanı üzläre ekrannan alıp torırğa bulğannar. Şuña kürä, sıra maqtağanda irlär bädräfendäge manzara xäzergä kürsätelmi tora.

Rimzil Wäli

XS
SM
MD
LG