Accessibility links

Кайнар хәбәр

Mäskäwdä 8 kön eçendä 2 jurnalist üterelde


Amerikan jurnalistı Forbes jurnalı möxarrire Pol Xlebnikovnıñ ülemennän soñ 10 kön dä ütmi – Mäskäwdä tağın ber tanılğan xalıqara jurnalist – rus telendä näşer itelüçe Armyanskiy Pereulok basması redaktorı Pail Peloyan üterelä. Peloyannıñ mäyeten şimbä irtäsendä Mäskäw çitendä tapqannar. Rusiäneñ internettağı mäğlümat çaraları "jurnalistlarğa qarşı räsmi iğlan itelmägän suğış başlanğanı" turında yazıp çıqtı.

Ärmän basması möxarrire Pail Peloyannıñ ülemen näq 8 kön elek üterelgän Pol Xlebnikovqa yasalğan höcümne kebek ük – anıñ eşenä bäylilär, xörmätle tıñlawçılar. Ämma Xlebnikovtan ayırmalı bularaq, Peloyan – qarşılıqlı temalarğa yazmıy ide. Xlebnikov – üz milken faş itmäskä tırışqan Rusiäneñ iñ bay keşeläreneñ isemlegen bastırıp çığarğan bulsa – Peloyan basması – sänğat turında ide. Mäskäwneñ ärmän disporası öçen näşer itelgän şuşı jurnalda – ädäbiät, sänğat häm tarix turında mäqälälär, ärmän yazuçılarınıñ äsärläre dönya kürä ide. Ämma Pail Peloyanğa höcüm yasalğanı şik tudırmıy häm anıñ säbäplären tikşerüçelär äytäçäk. Bu soñğı waqiğalär Rusiäneñ jurnalistlar öçen qurqınıç il bulğanına tağın ber dälil buldı. 2000nçe yıldan birle biredä 15jurnalist üterelde, Xlebnikov – berençe çit il jurnalistı ide... Quşma Ştatlarda urnaşqan Jurnalistlarnı yaqlaw komitetı üterüne kisken täñqitläp çıqtı häm Kremlne "mondıy ğamällärne cäzasız qaldıruı " öçen ğayepläde. Komitet mäğlümatlärenä qarağanda Rusiä – jurnalistlar öçen eşlärgä qurqınıç bulğan 10 il arasında isäplänä. İnternetta inglizçä çığuçı the Russian Journal xäbärlär säxifäse "jurnalistlarğa qarşı räsmi iğlan itelmägän suğış başlandı" häm jurnalistlar Mäskäwdä – yuqqa çığa bara, dip yazıp çıqtı. "Mäskäw yä Rusiädä jurnalistlarnı üterü – ğadättäntış äyber tügel, ämma 10 könnän dä äzräk waqıt eçendä – suğış barmağan şähärdä ike xäbärçeneñ üterelüe – bu inde Rusiä standartları belän dä – ğadättäntış xäl", dielä the Russian Journal isemle elektron gazetta. Rusiä mäğlümat çaraları Peloyannıñ üterelüenä zur iğtibar birmäde. Rusiädä 2 millionğa yaqın ärmän yäşi dip isäplänä. Mäskäwdäge Ärmänstan ilçelege räsmiläre – Peloyannıñ üleme bezne tetränderde, dip belderde. İlçelekneñ matbuğat wäkile Armen Gevondyan, interfax mäğlümat agentlığına, "bik qızğanıç" dip belderde. Häm Rusiä tikşerüçeläre belän bergä jurnalistnıñ ülemen tikşerüläre turında äytte. 2000nçe yılda Vladimir Putin Rusiä prezidentı urnına kilgännän birle üterelgän jurnalistlarnıñ sanı 16ğa citte. Pail Peloyan – 16nçı buldı. Armyanskiy Pereulok basması möxarrirennän 8 kön irtäräk, yülneñ 9zında – Forbes jurnalı redaktorı Pol Xlebnikov üterelde. Aña 41 yäş ide. Uzğan yılnıñ üktäberendä Tolyatinskoe Obozrenie basmasınıñ baş möxarrire Aleksey Sidorovqa höcüm yasaldı. Aña 31 yäş ide. Şuşı basma oyışqan cinäyätçelek, xökümättäge rişwätçelek turıda yaza ide. Aleksey Sidorovqa qadär şul uq basmanı citäklägän Valeriy İvanov ta 2002nçe yılnıñ apirl ayında 29 yäşendä başına atıp üterelgän ide. Şul uq 2002nçe yılnıñ martında Rostov-Don şähärendä kiçek öyenä qaytıp barğanda Naşe Vremya basması xäbärçese 29 yäşlek Natalya Skrıl üterelde. Jurnalist Tagmet metallurgiä şirkäte öçen barğan suğışnı tikşergän bulğan häm üleme aldınnan ğına bergä eşlägän jurnalistlarğa – bik kiräkle mäğlümat tapqanın häm tizdän anı yazıp çığaçaqın äytkän bulğan. Sverldaw ölkäse xakimiätlären täñqitlägän Novy Reft gazetı möxarrire Eduard Markeviç 2001nçe yılnıñ sintäbr ayında üterelde. Aña da 29 yäş ide. 2000nçe yılnıñ yülendä Novaya Gazeta xäbärçese İgor Domnikov üzenä bulğan höcümnän soñ ayaqqa basa almıyça alğan cärähätlärennän ike aydan wafat buldı. Aña 42 yäş ide.

Bolarnıñ berse turında da tikşerü mäğlümatläre bäyän itelmi. Jurnalistlarnı yaqlaw komitetı Pol Xlebnikovnıñ ülemennän soñ prezident Putinğa möräcäğät itep, "jurnalistlarnıñ üleme tikşerelmäwe, tieşle keşelärneñ cäzağa tartılmawı – Rusiädä qanunsızlıqnıñ däwam itüen häm sezneñ Rusiädäge cinäyätçel yustisiä sistmasında reformalar uzdıra almawığıznı kürsätä" dip täñqitläde.
XS
SM
MD
LG