Accessibility links

җомга, 9 декабрь 2016, Казан вакыты 01:07

Gaza sızığındağı çualışlar fälästin xakimiateneñ krizis kiçerüen kürsätä


Gaza sızığındağı iminlek xäleneñ tağın da kiskenläşüenä yul quymaw maqsatında fälästin citäkçese Yäsir Arafat düşämbe könne, üzeneñ tuğannan tuğanın iminlek başlığı itep bilgeläw qararın köçtän çığarırğa buldı. Gazadağı çualışlar näq menä şul säbäple, Arafatnıñ iminlek başlığı urının üzeneñ qärdäşenä birüe arqasında başlanıp kitkän ide. Yäkşämbedä qorallı törkem xätta Rafah şähärendä xärbi küzläw bülekçäse binasına höcüm yasadı.

Gaza sızığınnan çualışlar turında xäbärlär daimi kilep torsa da, bu yulı alar artında ğadi bäreleşlär genä tügel, ä şaqtıy citdi täräqqiat tora, xörmätle tıñlawçılar. Fälästin idaräse tirän krizis kiçerä diärgä bula, soñğı ike kön eçendä genä fälästin premyer-ministrı Äxmät Qıray ike märtäbä eşennän kitü teläge turında belderde. Moñardan tış yäkşämbe könne ber törkem qorallı fälästinle Rafahta, fälästin idaräseneñ xärbi küzläw bülekçäse binasına höcüm yasağan ide. Yäkşämbedän düşämbegä qarşı tön Gazada, äl-Aqsa fidailäre brigadası äğzaları häm Arafatqa tuğrı politsiä köçläre arasında qabınıp kitkän atışlar belän ütte, şular näticäsendä kimendä 12 keşe yaralandı dip xäbär itelde.

Audio

Bolarnıñ barısına da, Yäsir Arafatnıñ Gaza sızığındağı iminlek öçen cawaplı töp citäkçe itep üzeneñ tuğannan tuğanın Musa Arafatnı bilgeläwe säbäp buldı. France Press agentlığına yullağan belderüendä äl-Aqsa fidailäre törkeme, üz höcümnäre belän Arafatnıñ şuşı qararına qarşı buluın kürsätergä teläwen belderde. Şuşı suğışçan törkem, Arafatnıñ üz Fatax xäräkätenä yaqın torsa da, andağı fälästin radikalları 60 yäşlek Musa Arafatnı Gaza sızığınıñ iminlek başlığı itep bilgeläw İzrail säyäsätenä qarşı toru eşenä yardäm itmiäçäk digän fiker belderä. Alar anı ğomumän, fälästin idaräsendä çäçäk atqan rişwätçelek häm qodaçılıq simvolı itep kürä. Arafatnıñ üz tuğanın şundıy yuğarı urınğa bilgeläwe belän kileşmi, yäkşämbedä fälästin idaräseneñ yar buyı sağı başlığı Cuma Ğäli dä üz urınınnan kitüen belderde. Şulay itep, Arafat xakimiateneñ nigeze qaqşıy başlap, bu anda tirän ber krizis çığuğa säbäp buldı. Üz eşen barı tik uzğan noyäbrdän birle genä başqarıp kilgän premyer-ministr Äxmät Qıray da Arafatqa, bu eşennän kitü üteneçe belän ğariza tapşırdı, läkin fälästin citäkçese älegä monı kire qaqtı. Düşämbedä premyer-ministr üzeneñ şul telägen yänä qabatladı.

Audio, Äxmät Qıray

"Min premyer bularaq üzemneñ eştän kitüem xaqında ğariza birdem, min monı, räis Arafatqa mäğlüm säbäplär arqasında yazma ğariza yullawımnı yänä ber qabatlıym häm raslıym, ä ul säbäplär şul - fälästin cirlärendä xaos häm qanunsızlıqnıñ cäyelüe" dip añlata üz qararın fälästin premyer-ministrı Äxmäd Qıray. Anıñ süzlärençä, şul ğarizağa älegä yazma cawap alınmağan.

Audio, Äxmät Qıray

Düşämbedä Yäsir Arafat kierenkelekne beraz yomşartu maqsatında, tuğanın bilgeläw turındağı bäxäsle qararın ğämäldän çığardı häm Gazadağı ğomumi iminlek öçen cawaplı başlıq itep yañadan general Ğäbdelrazaq Mäcäyde rasladı. Ä ul isä şunda uq üzeneñ Arafatqa tuğrılığın belderep bolay dide.

Audio, Ğäbdelrazaq Mäcäyde

"Qorallı köçlärebezneñ şaqtıy ğına tarixı bar, Fälästin häm anıñ xalqı öçen bez küp närsä eşlädek häm eşlibez dä. Xäzer dä, ütkändäge tösle ük bez Arafat ğalicanäpläre citäkçelegendä eşlibez häm bu kiläçäktä şulay däwam itäçäk" di Gazadağı ğomumi iminlek başlığı general Ğäbdelrazaq Mäcäyde.

Kärim Kamal
XS
SM
MD
LG