Accessibility links

сишәмбе, 6 декабрь 2016, Казан вакыты 11:10

İyülneñ 17 sendä – Nijgar ölkäse Pilnä rayonı Safacay awılında rayon Sabantuyı uzdı


Bäyräm öylä namazınnan soñ ğına başlandı häm kiçkä qädär däwam itte. Çönki bu bäyräm aldınnan awılda yaña - bişençe mäçetneñ manarasın kütärü tantanası da buldı.Tantanalarda ölkä başlığı Gennadi Xodıyrev ta qatnaştı. Gubernator kilgän cirdä, ğädättä, rayon citäkçelege bula. Şulay itep, çaralarda räsmi xaqimiät tä, ölkäneñ baytaq din ähelläre qatnaştı. Mäçetlär açılu mäsäläsendä törle fikerlär yöri. “Tuğan yaq” gäzitendä, mäsälän, ber keçkenä awılda, buş torğan ike mäçetkä östäp, öçençe mäçet açıluın tänqitläp yazğan xat basılğan. Bu yazmağa ışansañ, mäçet salu modağa kerep kitkän, Mäskäwdä yäşäwçe baylar üzlären kürsätü öçen, dan yaular öçen genä iğänäçelek qılalar. Şul aqçanı ruxi tärbiä alıp baruçılarğa, yäğni mäktäplärdä yäki mädräsälärdä dinebezne yäş buınğa iñderü öçen qullanu küpkä faydalıraq bulır ide, digän fiker uzdıra gäzittä basılğan yazma. Uramda oçrağan ber xanımnıñ şundıy süzläre awılnıñ iñ abruylı din ähele Abdulvahab xäzrät belän äñgämägä etärde. Süz, nigezdä, yäş buınğa dinebezne iñderü, mäktäp belän mäçet arasındağı bağlanışlar turında bardı. Safacayda eşläp kilüçe mäxällälär mäktäp belän elemtä totarğa tırışalar. Uquçılar häm uqıtuçılar aldında wäğäzlär. Möğallimnär belän däreslär. Mäktäptä uzdırıla torğan törle çaralarda qatnaşu...

Läkin qayber tırışlıqlar räsmi türälär tarafınnan añlaw tapmıy. Mäsälän, Abdulvahhab xäzrät mäktäptä uqıtıla torğan alman tele urınına ğäräp telen uqıtu artınnan küp yörgän. Läkin bu tırışlıqları näticä birmägän. Ğaräp telen tüläwle itep fakul'tativlarda ğına bulsa da uqıtırğa da röxsät birmägännär. Xösäyen Fäyezxanownıñ dürtençe buın näsele bulğan Abdulvahhab xäzrät şärqi tellär belgeçe babasınıñ misalına da tayanıp qararğa tırışqan. Barıber añlaw tapmağan.

Xäyer, ğaräp telenä qarata şundıy “üzençälekle” mönäsäbät Nijgar ölkäsendä genä tügel, xätta Tatarstanda da xökem sörä ikän. Bua rayonı Adaw-Tolımbay awılı imamı Cäwdät xäzrät ber ğibrätle misal da kiterde. Mäktäp uquçıların, sıyır sawuçı yäki traktorçı itep äzerläw öçen, täcribäle sawımı yäki traktorçı da yarıy. Alardan pedagogik belem taläp itelmi. Ä menä mädräsälär tämamlağan, ğäräp telen qamil üzläştergän yuğarı belemle keşe dä, pedagogik beleme bulmasa, uqıtuçı sıyfatında tarifikatsiä uza almıy, di. Cäwdät xäzrät fikerençä, bu yasalma kirtälär islam dinen cäyeldermäs öçen maxsus qullanılalar.

Azatlıq radiosı, Ayrat İbrahim, Safacay - Tolımbay – Sember.

XS
SM
MD
LG